6-7位男士聚埋一齊，一字排開企好，動作一致低頭玩手機，大家以為佢地一齊打緊online game，實情係發生喺女裝店Fitting Room外。無錯，佢地做嘅事都係一樣，就係「等一個人試衫」！
相信每位男士都有經驗，每當你決定帶女朋友去一個有2-3間佢最熱愛時裝店嘅商場時，其實你已經係踏入「等一個人試衫」無限輪回嘅開始。
入到商場，女朋友：「嘩…呢間d衫好靚呀，我可唔可以入去睇下？」。雖然你內心已經諗緊：「上個禮拜點睇左囉」，但係你係無可能拒絕的。正如佢都會成日陪你睇你鐘意嘅鋪頭一樣。但當你踏入呢間鋪嘅時候，你嘅惡夢就開始來臨！
通常男女朋友喺一間時裝店嘅互動，都係得果幾味野。例如，女朋友會驚喜地講：「嘩，件褸好抵呀，特價3折呀！」。通常，呢個時候多數係5-8炎炎夏日嘅時候，你內心會喺1秒內回應一句：「你都硬膠嘅！」，但當然你唔會咁講，你通常只係會講句：「宜家夏天喎，著唔到…」就算，然後佢又會一臉唔甘心咁放返底。
跟住佢又會睇中件衫，然後想拎條褲去襯下個效果，但唔知點解條褲總係會搵唔到佢個Size，而佢又會不停咁搵。呢個時候，你會嘗試揀條類似而有佢Size 嘅褲等佢可以去襯衫，試圖推進佢邁向試身嘅進度。不過！女朋友一定會同你講：「我d褲多數係果隻色，呢條唔啱…」。你內心此時開始有點不順：「Oh My God！你又唔係買褲，只係用黎襯下件衫，洗唔洗咁精準呀，平時出街又唔見你咁準時！」
好喇，過左一輪，你陪佢再揀多兩揀，入左間鋪起計已經差唔多20-25分鐘，你情緒開始出現警號，開始覺得間鋪好壓迫，有d想離開。而呢個時候，你女朋友都應該會感覺到你嘅不耐煩，所以佢會作出一個英明嘅決定：「多謝你陪我揀，我宜家去試身喇！」。呢一刻，你條氣開始順d，因為你會認為你好快就可以逃離呢個壓迫嘅空間。
每當女朋友喺Fitting Room著住套試緊嘅衫問你意見時，你總會認真作答好睇定唔好睇，然後佢又會走返入去又試一輪。其實你等得真係唔係幾舒服，人又多，又要企喺Fitting Room出面俾人啤住，你望入去想睇下女朋友得未時，又怕其他女士以為你望佢地。所以通常你都拎部手機出黎分散下注意力，呢一刻你會發現身邊有6-7位男士做緊同做一樣嘅事，大家互相望一望，點一點頭，你唯一嘅安慰係：「I’m not alone！」。呢一刻嘅心情只有巴打們先能夠明白！
又再打多兩鋪機，女朋友終於換返好衫出返黎，你已經拎定信用卡，滿心歡喜決備幫佢埋單時，最令你失望嘅事情出現！女朋友話：「都係唔啱呀，我想拎頭先出面果件試下…」。呢一刻，你就如同神話中嘅薛西佛斯一樣，被諸神懲罰將巨石從山腳推上山，但每當臨到山頂時，巨石總係會跌返落山腳，結果每日要重覆將巨石推上去，永無止境！
無論女朋友再試多幾個回合，你再等多幾多分鐘，到最後結果都好可能係佢一件都唔買！你內心已經唔再憤怒，而係十分無奈問：「咁我等成粒幾鐘為d乜？」。雖然你已經等左粒幾鐘，但唔好唔記得，剛剛只係睇完左一間，隔離仲有好幾間未睇！
男士購物著重結果，女士購物著重過程，呢樣野係男士永遠唔會參透得到。「等一個人試衫」唔同「等一個人買衫」，重點係「等一個人」，如果呢個人係值得等嘅，等一世都等啦！記住：「巴打，You’re not alone!」