港大社科研究中心「扮中立」幫港共破壞香港已經唔係第一次。
搞場大龍鳳記者會仲要出真身，唔知頭唔知路嘅人就以為好學術中立啦。一睇，嘩＿，原來係收「左王」邵善波搞嘅中央政策組錢搞「推普機」維穩，消滅粵語。
呢個表面Social Science，實情係一等一文妓嘅中心，四年前已經幫機管局「分析」由機管局發展總監馮永業有份「睇過」嘅機管局三跑問卷，然後話有七成人支持三跑。就咁樣，呢個香港史上巨白象就喺呢個文妓中心「科學分析」之下，俾個分析金主機管局拎嚟話強推三跑喇。
不過，我更加唔明嘅係，點解冇一家傳媒立即報道，呢個「研究」係由中央政策局贊助？係傳媒編輯自己河蟹搞成咁？定係走去處理呢個記者會嘅記者唔夠精明眼？定係記者只睇新聞稿，連份報告頭果幾版講明中央政策組俾錢呢句都冇睇到？
當個個都話要守住香港果陣，究竟有幾多幾分時間同心機去做？我望唔透⋯⋯