（photo via cc Flickr user PROJana Reifegerste）
廢青總是多嘢諗，因為終日無所事事，只會食瞓痾同搵工，雖然我暫時乜都無，但有一樣嘢我肯定係比任何一個打工仔都多嘅，就係時間。我指的時間是「自己時間」，即是你可以隨意做你喜歡的事，自己做自己的揸fit人，既輕鬆又自由的時間，而不是機械式地在公司趕死線，或精神緊張地留意著客戶有否whatsapp你，或下班後累得在巴士上睡覺的時間。撫心自問，每天你有多少時間真正屬於你自己？
當然，「自己時間」很貴，至於幾貴，就視乎你的月薪，難怪搵錢越多的人越無「自己時間」，因為全都用來換成錢了。既然難得有「自己時間」，何不好好利用呢？而且細心想想，我確實周身刀，無張利，如果有人問我一技之長係咩，老老實實我真係答唔出，於是我決定的起心肝學鼓，雖然已經幾年無打，鼓棍都封晒塵唔知放咗去邊，但係我相信「只要有恆心，鼓棍都磨成針！」句嘢係就係老土啲，但總有佢道理嘅。
其實中學時期我已開始學鼓，原因簡單又幼稚，就是因為少女仔學，個個都話女仔不夠力打，一定輸蝕比男仔，又話女仔人家學鋼琴先夠大方得體，我偏唔學，我要學鼓！唔學由自可，一學就上癮，阿sir仲介紹幾個女仔比我組成一隊全女band，參加過比賽亦在尖沙咀海旁表演過一次，當時我好緊張，表演期間有一首歌仲打到甩bit，然後有個男人大叫：「加油啊女鼓手！」我真係感動到眼淚在心裡流，到現在還記得很清楚，當時應該是我打鼓的全盛時期，現在回想起都覺得好青春好熱血。
咁點解我會放棄？原因來來去去都係嗰啲，返工忙無時間、無錢學、學極都無進步等，最慘是Band友不和，有阿A就無阿B，我夾在中間實在不知如何是好，最後當然各散東西。搵新Band友？這絕非易事，我覺得Band友不只要音樂上夾，性格上夾也很重要，才可以好好溝通，試過和一班男仔夾Band，阿A只喜歡快歌，因為可以讓他狂solo結他，阿B卻只喜歡慢歌，說玩慢歌才有feel，只是商量玩咩歌已經嘈一大輪，然後夾歌時阿C只顧把Bass聲調至最大來突出自己，唉，這樣夾歌其實沒意思。
到了大學時期我也有再學鼓，還找了一個頗出名的導師，而且他在網上人人讚好，但不知是否我資質太差，有時遇到不明白的地方問他，他都好像表現得不耐煩，擺出一副「乜你咁都唔明」的嘴臉，加上那時真的很缺錢(學樂器一點也不平宜)，於是最後又放棄了。現在做過幾年打工仔，有錢(雖然再搵唔到工就撐唔到幾耐)有時間，便雄心壯志要學返鼓，上網查過在哪裡學鼓好，搞咗一大輪還是無結果，於是最後我選了＿Music，純粹因為分店近，打算賭一鋪，結果卻是非常極度好很失望！由於我覺得與琴行接待員的對話太經典，所以筆錄了，都係嗰句啦，本篇由真人真事改篇，如有雷同，實屬不幸。
「我想學鼓，想問有咩時間呢？」
「就返導師就星期日或一啦。」
「咁星期日吖。」
「好，應該12點至3點嘅其中1小時，我到時再confirm你。」
臨上堂前兩日嘅下午5點
「喂？我報咗星期日上堂學鼓o架，我想問可以confirm時間未？」
「應該就1點至2點，但係導師好多學生，要晏啲先confirm到你。」
「好，我等你電話。」
臨上堂前1日嘅晚上9點
「喂？我報咗聽日上堂學鼓o架，究竟可以confirm時間未？我又收唔到你電話所以打嚟問。」
「Er…導師其實唔prefer星期日，佢prefer平日，你okay？」
「吓？明明約咗聽日o架喎，呢個時間已經就晒你。」
「Er…咁聽日可以照上堂先，1點3至2點3吖，之後再轉返平日。」
「吓，好啦。」我說。
臨上堂前45分鐘
「喂？你出咗門口未？」
「未啊，做咩？」
「咁就啱喇，你前一個學生想加鐘，加半小時，你遲幾個字再出門口啦。」
「吓？咁都得？」
「如果你想，你一陣都可以加鐘o架！」
「。。。。。。」
臨上堂前30分鐘
「喂？你食咗飯未？」
「食咗喇又做乜！」我心諗唔好同我講個導師未食飯要去食飯，我會即刻反台！
「因為你前一個同學真係學得好開心，想加多15分鐘，你2點先嚟吖。」
「我而家就真係好唔開心喇！我已經出咗門口，你半個鐘之後又3個字，我點知你之後會唔會又再遲3個字，根本之後有學生就唔應該咁樣調時間！」我真心火都嚟埋。
「唔會o架喇，最後一次！」
最後上堂時間遲了45分鐘，我去到鼓房，唔夠冷氣好熱、鼓擺錯位、所有tom 嘅聲tune唔準、snare放在椅上，啲聲搞到似tom，我無奈地照打了5分鐘，接待員說：「唔好意思啊我地隔音設備未完善，麻煩你打細聲少少。」WTF？打真鼓可以點細聲？我從未試過一個咁惡劣嘅環境學鼓，連導師都覺得呢度怪，而家仲要捱多3堂，除了無奈，還是無奈，所以現跪求大家推介好的學鼓地方/教鼓好的阿sir/miss，無言感激！
最後，希望學緊樂器嘅大家繼續努力同好好enjoy，唔好好似我咁三分鐘熱度輕易放棄，同時希望放棄咗學樂器嘅大家可以重新學返，因為學到嘅嘢永遠係屬於你自己，好好善用那僅餘的「自己時間」吧！