今次要講一個「男主角一家貴人出門招風雨好死唔死捲入民眾暴動大屠殺本來去酒店附近買份報紙點知保險都買唔切就要趕返去救一家大細」嘅故事。
集「一家大細冚家閉翕」災難片例牌於一身：
阿爸係超人；
阿媽負責精神崩潰，危急關頭先會派上用場；
至於細路，根據上帝比主角老豆嘅考驗routine，一下就「一個寸咀+一個陀衰家」；一下就兩個都陀衰家。
（優生學喺災難片極少存在，近期啲嘅exceptional case係《加州大地震》）
證明豬隊友所造成嘅麻煩，遠比災難本身吸睛。
齋講氣氛營造，《No Escape》值高分嘅；講到底大家入場都睇呢類戲都係想爆一爆腎上腺素，即使劇情logic欠奉都無傷大雅。又關禮傑上身跳樓又坦克車又開場半個鐘嚟一劑假希望疑似救援直昇機其實升降大屠殺…動作方面係夠皮，但對劇情發展趕收工就點都無補於事。
講到racism，就狀甚瀨嘢。又暗/明示係邊部分嘅東南亞國家，又貶人地係第四世界，又影射人地暴民，又話人地啲囡囡媚洋腸，物化女性乜乜乜……就算最後比你解到畫話係美帝搞鳩人地搶民脂民膏先撩者賤至係導火線都無用啦。
人地又唔係香港人，天跌落嚟最多六十幾日就煙消雲散，嬲豬就一定啦～