前兩日Apple發佈會，十三億期待咗一年的iPhone6s終於面世，期待一年？！上一代先出咗一年咋喎，點解會期待一年？
吓？乜你哋唔係咩？其實全城最期待係「炒」呢個動作，每年炒iPhone就好似澳門派錢一樣，係例行公事，每次發佈會完咗全世界都「molamola無得炒la」同「蘋果已死」，到有得預訂當日就全世界都用盡方法去搶黎炒，呢個係定律黎。
「炒」呢個字幾十年前聽落第一個感覺係「炒魷魚」，當時經濟無咁好，無咗份工都唔知點生活。而家，一聽見「炒」，即係有機會發達咁解，炒iPhone、炒紀念鈔、炒演唱會飛、炒樓、炒股…香港地你仲以為安守本分打工就可以發到達啊？傻豬豬。
我記得上年，iPhone6開售頭幾日，有個同事用iPad買搶到一部自用，第日全公司都笑佢蠢，難得抽到部可以炒雙倍價值嘅手機，竟然唔拎去炒而係自己拿黎用。尤其最激動嘅係清潔阿姐，可能佢前一晚走咗去Apple Shop牛仔褲排隊，最後都買唔到電話所以心心不忿，佢直情一手拿住拖把，另一隻手指住個頭話我同事弱智。
順帶一提，個清潔阿姐仲用緊按鍵電話。
我同事本身就好鍾意玩gadget野，亦對炒賣興趣不大，買到新玩具佢寧願自己率先試玩，都唔想為幾千蚊炒完一輪要等幾個月。佢話喺外國讀書時一直都係咁，但無人話過佢蠢，點解喺香港會變成一個連清潔阿姐都睇唔起嘅蠢人？
聽人講旺角先達若果無咗一年一度炒iPhone活動，好可能逾半數要關門大吉。幾時開始，香港要靠「炒」黎生活，係香港人太貪錢？定係香港生活太艱難？
發佈會隔日，我同個同事傾緊枝Apple Pencil會否激到SJ翻生，塊畫板又會令Apple爭到乜野市場返黎。有個阿姐突然間走埋黎…
「傾緊iPhone啊？我都打算訂啊！」
「咦你都有睇發佈會咩？」我問。
「無啊，今日報紙講有我先知咋，我訂定炒咋嘛。」
今次，我個gadget同事一粒聲都無出，因為同佢哋講新iPhone 3D Touch會對日後apps發展有幾大影響係無用嘅，最緊要有得炒。就好似同佢哋解釋一個颱風係點形成都係無用，最緊要有八號風球唔洗返工。