名牌，我唔懂，都無錢追。呢個係上大學之前嘎狀況。東莞人，無名牌嘅概念。香奈兒，我聽過，貌似好厲害，而我不知厲害起邊。然後，去到北京讀大學，同深圳廣州啲人玩埋一齊，開頭成日聽拒地講converse、van，講chanel講burberry，完全唔知咩回事。後來，學人睇雜誌，又同姐姐去香港做下搬運，見到啲相啲櫥窗，終於知道咩叫名牌。大學生，又唔係富二代，邊到有錢買名牌。不過，我用梗。Why？東莞嘛，製造業城市，咩唔係呢度出。成皮紙嘅Alexander Wong水桶袋，幾蚊雞美金嘎H&M頭飾，都係Made in Dongguan嘎啦！我用梗，有咩出奇！
我用梗唔係A貨，都唔係超A。係咩貨？有樣板貨，有瑕疵貨，有倉底貨。
先講樣板貨。起版通常唔係一兩對，10對左右。手工絕對唔會差（差嘅點過骨啊！），客人睇完落單之後，就無用啦。於是，每隔一段時間就會有工廠啲人清樣板貨。過時？一般都唔會，因為，至少提前半年向工廠落單。我就見過後巷個朋友po過UGG樣板鞋出來啦，仲要係下季新款。
後巷朋友有時又會有一些瑕疵貨。數量唔多，通常得10-20件，或者更少。呢啲一般都係大牌子。牌子越大，對瑕疵貨要求越高，基本都會要求廠家剪爛，並且拍攝作證。但係，大陸人咁靈活變通，相，搵幾件爛貨影張咪係咯，留返大部份賣出去啦。阿head老實唔賣，下面啲馬仔要賺外快，梗係睬你都傻，偷偷地攞去賣啦。有人賣就自然有人幫手散貨。後巷朋友就係呢個散貨人了。
有無人舉報後巷朋友？當然會有啦！唔係使鬼哩埋後巷。不過，主要避嘅係執法人員。一個比人抓，好有可能連累到成間廠無生意。聰明嘎廠會剪標散貨。呢種貨數量大，屬倉底貨。倉底貨都不一定係太舊嘅貨。比較新嘎， 有時會賣去比外貿店。工廠有時係特登做多少少，唔訂mark賣比外貿店，咁樣個利潤都高番啲。
所以，東莞真係好多「外貿成衣」「出口鞋」店。我就試過100蚊買咗對售價20000yen 既HARAJUKU high heels翻來。呢個等級嘎貨，比較少。通常係比較平民嘎fast fashion商品多，Zara、H&M、Uniqlo最為人熟悉。打折99蚊，你覺得好抵，我哋買先40蚊，你話邊個抵啲。售價3990yen既袋，我買20蚊，你話邊個抵？
覺得我哋cheap，唔支持正版？Zara大陸賣得仲貴過香港，按深圳人均月入7000蚊來計，你都會同我一樣cheap，更何況東莞人均月入都未到7000蚊。我哋連一個800蚊超A手袋，都未捨得買，思前想後：「呢啲皮料呢啲五金拉練，使乜800蚊，去XX店買個差不多嘅瑕疵貨都係100蚊。800蚊，不如食咗佢！」
買得多，唔識牌子都識睇手工質地。講老實，撕咗牌嘅prada，你買唔買？我就見過三宅一生上年hit爆嘅三角紋袋仔，擺起店入面成3個月都未賣出十個，價錢只不過係30蚊。阿婆話：「咁肉酸，又裝唔到幾多嘢，3蚊都嫌佢阻訂啦！」
潮流？我哋唔懂，懂都唔買。因為，好多都係我哋自己做。
（原文：http://7thdaydream.blogspot.co.uk/2015/09/blog-post.html）