（photo via cc Flickr user Marvin Lee）
記得睇過一篇潮文好似叫《假如美斯生於香港》之類，好好笑，但好灰。香港係一個扼殺創意同天才嘅都市，大概你想到嘅天才嚟到香港，下場可能都係變咗小明，除著識上廣州，其實就同你我他一樣，冇晒獨特性。
要扼殺創意同天才其實唔難，你老細、你阿媽、你老師……可能日日都做緊呢個行為。
要扼殺創意，最簡單就係問佢攞Reference。大佬呀，講明創意，就梗係跳出個框，諗到啲前人冇諗過嘅嘢啦，你問佢邊度參考，噢賣葛！之但係又冇計嘅，當有人抄襲但一句話「新嘅idea通常都係base on舊嘅idea發展出嚟」而佢又發撚咗達，真係創乜鬼意丫，抄咪得囉，小米都係咁啦。
至於要扼殺天才，其實仲簡單，就係只要佢守規舉就得。天才有好多種嘅，如果廣義嚟講，天才通常都係才華洋溢，又離經叛道，默守成規嘅，十個有九個都同天才扯唔上關係；而天才同痴線，真係一線之差。好可惜，你老細、你阿媽、你老師……係見唔到天才嘅，點解？天才多數都會打破框架，唔守規舉，即係難管理，你諗下，你老師管唔到你會見家長，跟住到你阿媽管唔到你會發脾氣，到你出嚟做嘢，你老細管唔到你會發爛渣，總之都係一句，除咗中國人，你都係要管的。而你睇香港人嘅奴性同鍾意被管嘅本性，就明白「笑甚麼？你也是中國人」呢句話真係冇錯。
咁你明白，點解外國有Steve Jobs，有畢加索，有島山明，有愛迪生，有美斯，有Michael Jordan，有福山雅治，有G-Dragon……而香港冇。喺香港要搵天才？算吧啦六師弟，解決咗土地問題先啦，講條鐵咩。
創意同天才呢樣嘢，香港真係唔配擁有，香港人繼續炒下樓、炒下股票、炒下iPhone，走私下奶粉廁紙衛生巾，咁咪算囉。有樓真係唔買？有錢真係唔賺？係呀，我就係想話比你知，喺外國，人哋係欣賞你創作所以比錢你賺，未必影響到創意嘅本質。但喺香港？你快樂過生活，我努力去生存囉。有錢唔賺就係傻仔，當一個窮到除咗錢就乜都冇嘅地方，比領展攪到食飯只有集團集團同集團嘅單一化城市，人生4歲就要諗供樓，讀書搵工就係為咗供樓，我真係好想爆句粗口。
What’s going on in Hong Kong now? This city is dying? 死撚咗好耐啦。
最後引一句話作結，"Art is either plagiarism or revolution." (Paul Gauguin 1848 – 1903) 即係話，「藝術如果不是抄襲就是革命。」點解香港冇創意？香港人咁怕革命，你懂的。