我咁睇，有讀者對於我上一篇文章《哪位女生不要安全感》嘅我仍然缺乏安全感，只係圍住另一半轉，又認為我以偏概全覺得同異性texting就十成十一定有路無走雞，咁樣諗其實真係好白痴，大佬，無異性朋友嘅咩，講兩句又話有路？個腦無嘢呀？當然我都知道啦，可能對上篇文個重點講得唔夠出，個重點係：一個駁一個，而內容又唔係啲咩重要事嘅訊息。
大家有大家嘅社交圈子，有啲好多朋友，得閒無事都喜歡搵佢地講幾句吹下水，又喜歡一齊出街打機乜乜乜，亦有啲係君子之交淡如水，朋友唔會成日搵，但心裡面一直都有lee班朋友。而筆者呢，就屬於後者，同性異性朋友都有，但絕對唔會日日搵，更唔會三五七日就搵，有心事想傾下嘅咪搵囉，好隨心但唔代表唔上心。就lee個標題，不如先由我lee派「好日都唔搵朋友」嘅講下先。
嗱，我地就唔好局限喺性別上，社會有同性戀有異性戀，我就一概講sd短訊俾非戀人（講緊係一個駁一個嘅短訊）。耐唔耐約下食飯，傾下心事，八下邊個同邊個係咪有路／分左手，我搵朋友嘅原因都離唔開lee幾個原因，一句起兩句止，而行街睇戲食飯等，我都可以一個人做，其實朋友我真係好少搵。
當你知道你另一半係好似我lee派「好日都唔搵朋友」嘅人，但每日（定時定候）都同第二個人text，佢可以俾埋你睇佢地講乜，而你又真係睇到無啲咩特別，又無咩曖昧嘢，就係好奇怪另一半唔多搵朋友，但又會成日都會同果個朋友傾埋啲無謂，留意，啲訊息係一個駁一個（好重要，所以宜家我講第二次）：「喂 食左飯未呀？」「食左喇 你呢？今日食乜呀？」「未食呀 老闆都唔係人黎 唔俾人放飯囉 話咩唔做晒唔食得喎 佢都忽忽地架。」「哈哈哈 係咪咁好笑呀 偷偷去食都唔會話你啦 唔通真係咁而炒左你咩 係嘅話記住即刻話我聽 我一定即刻cap圖up上fb」「你都傻嘅 咁我咪俾人起底」bla bla bla，筆者咁打左幾句都覺得好無聊，完完全全係一大段毫無養份嘅對話，而我唔知道會無限延伸到幾時，我都可以好肯定話你聽，如果我係同一個朋友講緊lee類無意思嘅對話，我一定係想FLIRT佢或有進一步嘅發展，咩都好，一定唔只係朋友咁簡單。
我係lee一派嘅人，兩度前度都係lee派嘅人，但我都發現佢地都有一個「經常」搵但又無曖昧字眼嘅訊息嘅對象，當然果陣時嘅我好天真好傻，佢地講咩我咪信咩囉，無嘢咪無嘢囉，但日子越耐，發覺越唔對路，我心諗：「係咪真係咁X多嘢講，同我都唔講嘅嘢竟然同第二個人密密講，仲要咁無營養」，留意，啲訊息係一個駁一個（好重要，所以宜家我講第三次），總之就唔係一句起兩句止果啲，你地明邊啲架啦？當你質問時，可以換黎N個回應：「無嘢架真係，你唔好諗太多啦」、「佢等緊人咁arm有時間想搵下人吹水啫，咪同佢講啲廢嘢囉」等，再唔係你咁不幸同佢一齊恥笑緊fb上有個朋友個頭幾咁柒時，機頂彈出一個whatsapp通知，見到果個「朋友」嘅名話：「哈哈，咁我都唔知點幫你喇」，極度敏感嘅女生如我就會諗究竟我「好日都唔搵朋友」嘅另一半同佢講左啲乜會換來lee句「哈哈，咁我都唔知點幫你喇」。我唔想諗，伙計唔該照舊，咕嚕一聲吞左去。問黎都多餘，總之隔一段時間都無覆我短訊，我就起疑，點呀？係咪又同「朋友」玩緊？
相信有同感嘅讀者都會明白果種等待嘅感覺絕對係一種煎熬，真係恨不得你直接殺左我，比重讀高考等派成績前果刻更忐忑不安（唔好意思，筆者考高考大，真係好L恐怖），情感敏感嘅女生完全可以因此患上抑鬱症，唔係講笑，我真係曾因此哭笑不得，自言自語，更有自毀嘅意念，果種不安嘅感覺令到自己好難受，到一日我醒覺唔想再俾lee種不安情緒凌駕住，係咁先。根本我自己都知道，當我會花時間一個駁一個訊息（收到未？）去同一個「朋友」溝通，我其實係想認識佢多啲，喺對方心目中留下一個印象，總之就係要佢對我上心。當我自己都好明白個遊戲規則時，無理由仲咁白痴覺得另一半口中嘅「無嘢架」係講真吧？我個人絕對大方，絕對容許另一半與異性或同性交流，甚至單獨出街食飯我都無問題，因為我好相信人識得自律，底線喺邊，咁大個人，唔好同我講唔知，所以我相信如果另一半真係只愛我嘅話，唔會做任何令我會生疑嘅事，我亦都唔會限制對方做任何事。
然後可以講下另一派「見朋友多過食飯」，首先我唔係lee派人，唔好怪我講得唔夠深入，我地黎個淺入淺出。筆者有位朋友係lee派人，有時聽佢講以前同男朋友嘅事，都會覺得好神奇。我位女性朋友好喜歡social，得閒就同朋友周圍玩（唔似筆者一係一個人，一係同另一半），即使同異性朋友都可以攬頭攬頸傾密計，同班異性朋友食飯打邊爐到凌晨，佢會覺得只係好純粹係一個好好朋友嘅表現，好到根本唔會發生啲咩事嘅朋友，更唔關同性異性事，係，佢係咁樣同佢前男朋友咁解釋過，但前男朋友唔接受亦都唔明白，先莫論佢前男友係咪小器無量度，我作為一個朋友，咁樣聽到，我都覺得過唔去，確實好似過份左，唔好怪前男友唔明白，但同一時間我又明白我朋友真係當果班人係好好朋友而無任何其他嘢，問題係一個係愛social嘅人，另一個唔係呢。又講下我lee位朋友近來同一個有女友嘅男同事密密text兼晚晚傾電話，嗱，我朋友就覺得自己無講到啲咩嘢，但我地班friend一睇內容（先唔研究emoji嘅詮釋）都嘩一聲，「咁都唔叫有嘢？」而我朋友仍然唔覺得自己有咩問題，我唔怪佢，因為佢長期活喺中學異性好朋友嘅圈子中，佢習慣咁樣相處，佢唔明白有啲咩問題（又先唔講佢其實係有嘢但唔認／唔自知），而我地好簡單問佢一個問題：「如果你見到你男友咁樣同個女仔傾計又傾電話又晚晚good night咁，你點諗？」丫，佢又好神奇覺得：「好似有啲唔對路…」
無論多搵朋友少搵朋友又好，texting嘅頻密程度確實好容易睇得出你對果個人係咪有嘢，點都好，實有嘢，除非無嘢。而筆者自己係咪只圍住另一半轉又缺乏安全感？其實生活中唔係只係得愛情，我lee派唔多搵朋友嘅好多時候都係自己同自己相處，可以睇書、睇戲、思考，而我另一半都係同類嘅人，我宜家唔再去亂諗佢唔應我係咪同緊第二個text定點樣，唔煎熬唔繃緊，好心安理得覺得佢只係可能睇緊書或睇緊電影或訓緊，而唔係背住我搞三搞四。愛情需要私人空間，如何喺大家都有私人空間，而唔係秒秒講電話或texting去「監視」對方，但又好安心唔覺佢係勾三搭四，對我黎講（其實我唔明點解要指明對我黎講，明明篇嘢係我打，喺我自身出發，我梗係講自己所覺得嘅嘢啦，但你唔講明，人地會覺得你唔夠全面，而我唔明點解要全面，我都係純粹投稿講下自己所見所聞所想，唔係又要阿邊個邊個approve先成立呀？好好笑），係好有難度。經過兩段感情嘅精神虐待，我宜家好輕鬆好安穩，我無因過去而對現任不存任何信心，而係覺得敏感嘅我依然敏感，對事情依然一視同仁，重點在於我另一半點樣去處理任何有機會令我存疑嘅嘢。我唔喜歡事事講出口，再講一次我覺得人係自律嘅，要到我講出口時就已經我唔再能夠容忍嘅程度，亦慶幸另一半有住類同嘅價值觀，所以好多時都明白對方點諗，然後唔會去做啲「唔應該」做嘅事。
最後想講，好多時候我都覺得女性嘅直覺幾準，你係覺得唔妥唔對路就要問到底，當然又要睇你同另一半嘅相處之道係點，唔係下下都磨合好，好多時都係你唔明我，我唔明你架啦，點都好，有嘢無嘢，都要攤開出黎講，以為唔提唔提就無事？你地合力整緊個計時炸彈不自知而已。