（photo via cc Flickr user penny）
上一次講到小弟觀察到我啲朋友或者親朋戚友通常會係打牌做啲咩反應或者行為舉措，會令到旁觀者比較易推測到佢地大概既為人，例如極速排好晒牌都頗有組織力啦。另外，打花章嗰啲更加唔使講，應變能力差極有限。
小弟見開嗰啲就打廣東牌多（台灣牌見過兩三次，其實都係差唔多，只係通常冇三番起糊呢個設定），當然，其實扣牌鬆章未必一定係冇牌品，當中要有好多前文後理，上文下理，來龍去脈先可以起到一個咁既小結論。不過今日，小弟係想分享一個真人真事。
嗰日係一日平凡既一日，又有一個朋友好興高采烈咁約人打牌，但係因為有啲人又要唔知點遲到早退，所以計埋佢在內總共有五個人係畀佢約咗既。
當然，小弟依然係做「第五人」既最佳人選（唔知點解），然後佢地四個人就好開心咁係到一邊談笑風生，一邊決戰四方城。
咁點解會有今日呢篇文既題目出現呢？
就係打打吓，有一條友唔知係咁啱嗰日黑仔還是唔夠精神定點樣，總之就係諸事不順，打邊隻摸邊隻，扣起晒三家既牌都可以畀人自摸，而佢自己就一次自摸都冇食過，唔係，係簡單一鋪都冇食過。禍不單行，次次一摸上手，啲花款係非常平均，嗰三隻番子仲係冇一隻重複。
小弟係執邊睇睇吓都見唔對路，其他三個人越打越開心，越打越興奮，隔幾秒唔係嗌上就係碰，甚至係：食呀食呀清一色。而黑仔嗰條友塊面就越黎越西，越黎 越黑。我嗰時係到諗：正常既，邊個咁當黑會仲可以笑面迎人，滿面春風既呢？但越觀察得耐，就越發覺唔妥。
打到中途，開始feel到條友係亂打，又或者特登出銃畀人發晦氣，明知人地差一隻白板大三元都照出，個面色更加唔洗講，完全係嗰啲：係呀，我而家係亂打架啦打我呀笨。打完骰攞牌既時候仲要唔主動攞，要人攞比佢，到戰鬥既時候一係就一秒尻扔牌，一係就呆足十幾秒先打，搞到成枱人都開始躁。
打牌其實都有所謂體育精神，就算你嗰日狀態唔好都唔洗咁晦氣，搞到成場氣氛完全係超負面，另外三人話不如比我打，佢又賴死唔走，話打埋呢四圈先換得人換得位，咁又係有道理既，但佢咁樣既態度應該都唔使旨意會有朋友再邀佢去打牌。
到最後嗰三條友有個人有事要早走，就換我落場打，小弟牌技就自認係劣質嗰啲，番數都係幾識計，但好明顯係感覺到個黑仔王係真係鑊鑊都係爛牌加爛摸手，呢樣唔係重點，重點係佢之後係晦氣到攤開啲牌黎打。
呢一吓我地真係忍佢唔到，佢攤開副牌打不如真係唔好打，咁冇牌品爛牌都唔認真打，個態度咁差真係好影響全世界。最後本身係諗住打到去接近凌晨甚至可能通埋頂既。冇啦！就係畀條黑仔王搞串晒個party。
輸贏其實真係唔重要，學叻咕叻咕有句對白話：牌品唔好等如人品唔好，牌品好人品自然好。
之後依我印象，條友好似再冇畀人搵過去打牌。