我係樹仁新聞畢業，我覺得健吾做法冇問題

樹仁新聞系師弟妹想約健吾做訪問打錯人哋個姓，健吾cap圖放上Facebook page，就畀一大班人話佢唔尊重人、對學生都咁小器、居心叵測乜乜乜，當中好多係師兄姐、同學，呢一刻真係有啲驚畀人知道自己都係樹仁新聞畢業。

個page係健吾嘅個人page嚟。我個Facebook我個page係我主場，我有ac我就係方丈，你唔鍾意睇咪unlike and hide all囉，返去你自己個爐度取暖囉。

公開PM係冇品，所以健吾已經遮咗學生個名，保障學生身份。遮啲唔遮啲就係針對學校、學系？我唔直接答你，我用例子答你。如果你寫單裸跑新聞，「一名姓蔡男子被發現於旺角西洋菜街裸體倒立扮狗吠」，講啲唔講啲實係針對姓蔡啦，好啦就咁寫「一名男子被發現於旺角西洋菜街裸體倒立扮狗吠」，都係針對男人啦。好在有正常思考能力嘅人都會諗到，發生呢件事唔代表所有姓蔡嘅男人都會裸跑，不過如果日日都有男人裸跑，而且個個都姓蔡嘅，搞到啲人覺得姓蔡嘅男人都會裸跑，咁最衰都係因為你寫單嘢出嚟，唔係裸跑嘅人有責任，啱唔啱呀？

仲有人覺得健吾個page好多人睇，當事人仲係學生，咁樣公開對佢哋影響好大，唔洗用呢個方式處理。乜原來學生記者唔係記者，係冇咁專業、冇咁有公信力，所得待遇應該同記者唔同，即係我哋學系老師一直為學生記者受到不公平待遇去投訴、爭取都係白做，以後說．在線、《仁聞報》記者去記招、活動會場採訪被拒，約機構訪問被要求「做義工」交換，被新聞官、公關冷待，都係合理㗎，因為唔洗當佢哋係記者丫嘛，學生嚟啫唔洗咁嘅。

新聞系由day1已經開始講，呢行係行頭窄，做過啲乜好快通行知，我哋都聽埋聽埋咁多師兄師姐嘅經典奶嘢case，立法會扑咪叫錯議員全名，喺記招問行家嘢時阻住人聽嘢、冇禮貌，言語傷害、冒犯甚至威嚇到受訪者等等，唔爭在今次搞錯健吾個姓，點解又唔批評其他講我哋師兄姐啲事出嚟嘅人？

如果一個人奶一次嘢就影響到佢成個將來，咁IFC條龍排到落地底都唔夠，但之前奶過嘢嘅師兄姐今日依然好地地企喺度。李志堅師兄同我哋分享，夠話佢初初做無綫時好廢，做live口疾疾，搵人幫手剪片包帶都冇人想理佢，之後咪做到港視新聞總監，宜加港視新聞冇得撈，都自資出到條講記者採訪佔領嘅紀錄片《撼動》。

好多前輩第一份工都係做錯嘢畀人鬧，份稿改到七彩先出得街，甚至試用期未過就炒咗，唔通今次兩個同學被受訪者批評搞錯姓氏，就會因此以後冇得做傳媒？錯就要認，打就企定，跟住起身再行過，冇問題。

不過其實健吾唔識我，依然連自己學系都唔幫，先唔講由細到大都係節目聽眾，我哋都咁鍾意投稿去輔仁呢個專登垃圾文嘅咸網，健吾又share過篇我寫嘅訪問，實係想圍容樂其個爐啦，仲要係畢業幾個月都唔搵工嘅廢青，冇機構畀你公開，容總快啲包養我啦，呢篇文有冇稿費呀¹？

1. 編按：呢類評論夠CLICK 咪有～至於你平日個D 報導就另計～～：）