話說昨夜凌晨收到女朋友send 咗呢幅圖畀我，雖然我知光洙係邊個，但唔知個手勢咩意思，起初以為女朋友想問我拎錢，我腦海當堂浮現咗我慘被賣豬仔嘅情景。
正當我諗住含淚一脫以謝天華嘅時候，女朋友話呢個係韓國近年好興嘅單手心心手勢，我即刻鬆返一口氣，著返件衫先。
定一定神再望真啲，個手勢其實都幾有意思。愛一個人，最重要係有一顆堅定不移嘅心，否則變咗質嘅愛情下場只有兩個。第一個就係好似我第一眼誤會幅圖嘅意思咁，個心唔夠堅定，郁吓郁吓就變咗好似問人拿錢咁，同金錢掛勾嘅愛情永遠唔會有好下場，男女都好，年中都聽唔少受騙個案。
而另一個變質嘅愛情，就係對方根本對你無「心」，只在乎得到你肉體。Marketing 無咗market 會「停」。咁「愛情」無咗「心」會變成乜？咪「受精」囉…至於你問點解中間有個米字？咪玩啦大佬，你無米點氹得掂人哋受精啊！
以上對話我當然無同女朋友講，我對佢不知幾堅定！不過後尾遇到更加大嘅危機，幸好我都識返少少韓文，又識得學以致用，先至化險為夷…