前兩日見到香討個女友掉爛男友saxophone post，其實好假，但都引起左一陣討論，仲有巴打無乜關係咁share返啲女友逼自己掉高達模型、手辦、漫畫之類嘅post，令兩性關係突然降至低點。
呢啲掉模型、漫畫、主機嘅情形，其實通常發生係結婚嘅時候，因為香港長期有土地不足問題，一個男人半世人所儲下嘅浪漫，多數無辦法全部帶到新屋之中。呢個時候女人就算唔出聲，男人都要好似大部份主角咁做一個人性抉擇：要女，定要高達？你真係主角嘅話就梗係why not both，不過現實好多時只能夠二選一……而決定左結婚，好多時都只能夠部分放棄後者──係「部分」，如果被逼完全放棄，男人一定跳制。
男人同女人求婚，許下愛的誠諾，咁點解仲唔肯放棄物質上嘅野？其實咁樣唔代表唔愛個女人，但要記住，人係無法與童年割捨的生物，而男人係會誠實地表現出嚟，而且仲好長情。細個砌過嘅高達、儲過嘅卡、睇過嘅漫畫、打爆過嘅game、受過安慰嘅角色，真心鍾意嘅係絕對唔會掉，見到相關嘅商品重新推出，亦可能會盲目搶購，搞到屋企愈來愈多星矢、高達、玩具、漫畫、手辦……男人咁樣唔係因為小朋友，而係想延續一種浪漫，一種回憶。在女人眼中呢啲物質可能只係一啲膠、一啲紙，但係男人心中，佢地就係一切，代表自己嘅成長，自己嘅成就，自己嘅身份。
至於女仔應該點做，我嘅建議係唔好為爭返一席位而挑戰男人嘅底線。當女人以為自己已經做到正印、老婆，但其實即使到談婚論嫁呢種時候，女人仍然可以只係小三。男人嘅真正伴侶，係佢嘅童年。除非你同呢個男人係青梅竹馬，否則呢啲「伴侶」已經陪伴左男人十幾廿年，給予佢支持、感動與安慰。當然，如果你係一個稱職嘅女友，同男人一齊之後你都俾到支持佢，但你就忍心趕走成就你男人的事物嗎？先別把自己看得那麼高，否則最後你會好痛苦的。
其實我有我睇高達，你有你睇韓劇，咪相安無事囉？最緊要都係學五四精神咁，尊重和包容。依家女朋友對我都算尊重，睇動漫、買高達唔會干涉〈真係到結婚就唔知了〉，而我亦會借啲位教育佢關於高達嘅知識，解釋唔同作品中嘅世界觀同意義，希望佢理解高達唔係好似GUNDAM VS咁只係打來打去咁膚淺；同時倒轉我又學下化妝品、韓劇日劇咁，可以話係溝通嘅一環。
上文不斷講高達只係因為我個人喜好，但如果巴打們有自己鍾意嘅作品、角色，不妨同對方分享下，等女方認識你多啲，亦可避免日後出現誤會。
當然，首先你要有……