從朋友口中得知原來青年廣場將會搞一場南管同A Cappella crossover 嘅音樂會，演出者有王心心同埋VOCO NOVO爵諾人聲樂團，可謂係中西合璧嘅創新表演。聽到消息後立刻上網試下仲有冇得拎免費飛。四年前我曾經受朋友邀約睇左一場A Cappella 音樂會，自此就愛上左A Cappella，愛上佢自然而且豐富嘅人聲伴奏，更加欣賞演出者嘅唱功，比起著重舞台效果嘅流行曲歌手，A Cappella音樂人更加顯得實力雄厚。今次好好彩可以拎到兩張飛同朋友一齊去欣賞，因為係不設劃位嘅關係，當然一早去排隊搵個最靚嘅位置慢慢欣賞喇！聽現場嘅工作人員講，今次已經係王心心第二次係青年廣場演出架喇，上一次亦都係同其他藝術團體一齊演出，仲要係免費嘅，不過就要捐贈文具為慈善用途先入得場。而家諗番起，真係覺得上一次錯過左好可惜呀……
合共兩小時嘅音樂會原來係由青年廣場同光華新聞文化中心合辦（經過今次先知道青年廣場吾只係一座建築物，佢亦會搞吾同嘅文藝活動:0)，而VOCO NOVO更加係台灣嘅代表。可能係台灣機構合辦嘅關係？！當晚香港民政事務局副局長許曉暉亦都到場支持。幾位音樂人一共演出左九首詩詞同埋一啲現代歌曲，包括為人熟悉嘅《靜夜思》、《聲聲慢》同《驀然回首》。
音樂會前我亦有做「資料搜集」，發現原來南管係全中國最古樸嘅樂種之一，起源於中國福建泉州。而王心心更加係少有嘅福建泉州南管世家音樂人，堪稱閩南南管最純正嘅代表，有「五塊交椅坐透透」嘅稱謂（即對琵琶、洞簫、三弦、二弦、唱工皆精通嘅意思），睇到呢啲資料令我對今次嘅音樂會抱有更大期望。係香港土生土長嘅我以往並未有機會欣賞南管音樂嘅演出（甚至第一次聽聞南管古樂），今次演唱會可謂大開眼界。原來南管嘅慢唱係好優美，第一次欣賞中式歌唱表演嘅我亦都有試過閉上眼感受一下演唱者想表達嘅心情。集中聽覺嘅感受後，發現王心心嘅聲音變得更加溫柔，好有中國嘅古典感覺。王心心當日除左演唱外當然亦有以琵琶、洞簫等配合演出，展現出中國古代文人詩詞淒美情感。
真正吸引我到音樂會嘅其實係VOCO NOVO爵諾人聲樂團，VOCO NOVO係少數嘅「跨界」團體，除左演出當代爵士音樂之外，VOCO NOVO亦擅長演唱古典歌曲，中國古典詩詞嘅改編吟唱已經成為呢個團體嘅一大特色。今次南管同 A Cappella嘅合演帶俾我一種好新鮮嘅感覺。以往我對A Cappella有一種誤解，以為佢背負住現代歌曲嘅限制，但今次VOCO NOVO 以A Cappella 形式演唱了多首古詩古詞，既復古但又創新。
王心心同VOCO NOVO當晚更演繹左現代詩人余光中所作嘅著名詩作《鄉愁》。以前上中文課堂成日朗讀嘅《鄉愁》經重新編寫詞曲後，由幾位音樂人以典雅嘅南管音樂配合充滿西方音律嘅A Cappella形式程現係觀眾眼前，由「詩」變成「歌」。王心心同VOCO NOVO團員更身穿民國時期嘅衣著以配合詩中嘅情景，如果將視線完全集中於舞台上，就會有一種置身於當時環境之中嘅感覺，別有一番風味。我自己好喜歡王心心同VOCO NOVO聲音上嘅配合，以為南管曲調同A Cappella會格格不入，但原來聽落都幾和諧舒服。聽完演唱會後，我亦有支持一下古典藝術，買左一隻王心心嘅CD，番屋企再慢慢欣賞。