其實真係唔好咁啦。
睇電視，見到麥國風戰敗，真心覺得有啲唔抵的。之後再見到阿牛再敗，亦覺得幾唏噓。但黃先生你講啲咁嘅嘢，唔覺得好有問題嘅咩？即係而家社民連全軍覆沒你仍然好開心？一個民選議席都無你仍然覺得好多人支持你好有代表性？
打仗係要有戰略，要有技巧，唔係好似宋襄公咁「嗱講明大家排好先打仗嫁」「嗱我打你一拳，你又打返我一拳，唔准出腳嫁！」，你而家咁，即係等如你跑住步去報一級方程式賽車，輸到天黑然後自己仲施施然話自己跑得好掂。輸咗仍然保持氣度風度同格調係需要嘅，但唔係咁囉。
而家咁樣，你又選唔到，你拎住果 1406 票代表乜？只係令你感覺良好？你而家幫到呢 1406人咩？你有議席有政府資源去幫佢哋咩？無！你係辜負咗呢 1406人呀！仲好意思拎黎講！你口中嘅「追殺老人政客」，都要個老人政客做唔到嘢，村民先會投新人嫁！呢個都係建基於建設社區嘅考量呀！你眼中叫投機，但新人落區，果區有新選擇，先叫曙光呀！
社民連內務副主席？咁嘅水平，咁嘅觀念去從政，去選舉？個黨嘅成績已經反映咗呢種思維嘅害處。抱住咁嘅思維去做社運，每次都只係沾沾自喜「雖然我哋乜都影響唔到！但我哋！今日！有！十萬人出黎！已經！好！成！功！」，咁社會又點樣有變革呀？真係「不是精神勝利， 而是一份普遍嚮往；更不是不想拿議席，而是每個參選人都實現了勝選以外更崇高的勝利。」！
獨媒推廣呢類文章，真正功德無量。