郭富城的新女友乃中国女。坊間又有一場熱烈談論。見到有人踩港女，作為港女港媽，為此想為港女抱不平。
1.貪錢：
這是現實問題。香港地揾幾萬都月月清。食餐翠華都成嚿水。港女都係被現實折磨的一群。想個家過得好啲，有乜問題？
在動物界，雌性都係會選擇叻啲（搵到食）的雄性。而放在現代社會，「搵到食」係用咗「$」來量化。
況且男揀靚女，女揀叻仔，人人都在選擇，我睇唔出誰比誰高尚。
2.高傲：
港女的確比起其他妹冇咁親切。港女生長在充滿戒心的社會，不是要你搵人著數，只是要防人揾你著數。
不過你地覺得台妹大陸妹對港男親切啲，情況係佢地覺得港男搵錢多啲。你地留心下佢地對本地男係咪同一態度。
3.崇洋：
鬼佬做得expat.，人工係的確比本地人高好多。(point 1 achieved)
更攞港男命的，是風度。拉下門、拉下櫈、自動行在近馬路的一邊，好多港男也是未有此知覺的。我不想比較，始終也是成長環境做成。人地18歲已經自己生活，港男到卅歲仍有老母服侍。我仲未計識做家務識煮飯呢個技能。
4.膚淺：
只係睇TVB蘋果discuss。除了這些，我們還有什麼選擇？放工回來都只剩半條命。我們和男人一樣，需要腦袋放空，男人可以打機，女人唯有看不用用腦的八卦嘢。
其實香港教育著重實用性而輕思考訓練。我們身邊有幾多男女看過／看懂尼采？
我身邊的港女都是有情有義，兩公婆識於微時，一人一份工捱大一頭家。返工要受氣，回家又要為子女丈夫工人張羅。
在此不是想踩邊個抬高邊個。港男港女才是我地的同胞。踩來踩去，只會把自己人往敵人方向推。
若果要所謂香港建國，首先不可以賤視國民。收手啦，好嘛？
（編按：物以類聚既我覺得……）