Well…… I dunno. 但我覺得郭富城今次情陷大陸模，仲話要成家，都幾有啟發性。
其實男人唔係唔想成家，唔係唔想「負起責任」，但男人係會盡佢哋能力去拖延呢樣嘢發生。始終做個大細路，日日風花雪月係開心嘅，不過正如梁振英總會死，龍肉都會有食到無味嘅一日，當男人玩夠，其實都會想成家，想生仔。
我一向覺得結婚生仔只係另一個人生階段，雖然唔可以話係一種線性嘅「升LE」過程，但總係人生嘅一啲標杆。人生可以有好多嘢追求，結婚或者生仔就係其中之一。生命就係有好多嘢可以畀人去做，每一種都係一個目標，結婚生仔就係呢類。等如如果一個人對攀登道德珠峰好有熱情，視之為終生寄託同目標，其實係等如同座道德峰結婚咁之嘛。
講返郭富城。我見有啲朋友，風流倜儻，十分靚仔，食女無數，笑傲情場，但到三十幾，開始個人都想定落黎，於是可能忽然會走去結婚。呢個時候出現喺佢生命嘅人就係同佢過人世嘅人喇。呢個人未必係最靚，最大波，最溫柔最好，只不過係適當嘅時間出現。
而男人最得意嘅地方係，佢哋嘅生理結構註定佢哋天生更有「賴皮」嘅條件，咁你無計，生理上男人到六七八十都生得（何生生最後生嘅子女時好似都七十幾八十？），女人唔得。呢種基因我認為係會好微細地影響男女嘅價值觀，唔係話個個女人都想生仔，更加唔係話個個女人都要生仔（物化女性，父權壓迫 spot！），即係等如有人話男人天生要搵女性交配，而且條嘢夠顯眼，所以男人更多有自瀆（打飛機呀！）嘅習慣咁。呢啲觀察唔係話「女人就唔自瀆」，而係講緊一啲生理條件嘅限制（或自由）令男人同女人可能有啲性格同取向嘅不同。
噉咁啱郭富城嘅例子係，佢到五十歲想定囉。咁解。身邊嘅朋友，二十尾結婚嘅有一堆，到三十中忽然又會有一堆結婚，然後可能到四十幾五十就有啲人好似郭富城咁，有啲人可能有第二第三春了。
最後我想講下，好多人話「男人來來去去都只中意二十幾」，其實我覺得呢句說話非常之父權壓迫，物化男性，刻板印象，但既然係恥笑男人所以就無乜人講。李國章，曾鈺成嘅「第二春」其實都四十歲同五十九歲，有時一個人有無第二春，真係睇性格的。而呢個位，無可否認，東方社會係的而且確（絕無曲線）有壓迫女性嘅。觀念上比較束縛女性尋找第二春，束縛「暮年戀」。你睇下外國，大把人到五六十，七老八十，再拍過拖啦， So What!?