「害怕悲劇重演，我的命中命中，沒理由分組可以沒有暗涌~」
唔知係唔係同學校個八字唔夾，由細個去睇drama跌咗張學生八達通落凳底執唔返，到而家考咗入黎讀書又遇到啲世界級組員，每件事都令我有一種唯有業隨身嘅感覺。
趁住Sem尾，又黎到大家喪催組員（或者俾組員喪催，唉） 上水傾Project嘅時候，就等我同大家分享自己喺呢個Sem遇到嘅世界級組員｡假如你覺得有共鳴嘅，起碼你會知道呢個世界上仲有我陪你受苦；如果你覺得你啲組員比我果啲好得多嘅，就俾啲心機做好份功課佢，齊齊高分，唔好迫到組員臨deadline先走黎發火啦。
今日想向大家介紹嘅係第一類世界級組員，我會稱之為「舢舨充炮艇類」。
呢種組員平日渾渾噩噩過日子，課堂能走即走，走堂Quota用完就乾脆將講堂當成睡房，真係唔知佢俾四萬二千一黎上堂係做乜。講到呢度，大家可能以為我講緊嘅係Freerider, 真係少年你太年輕了，講明世界級組員，邊有咁簡單。
呢種組員最特別嘅地方就係每逢分組就意見多多，美其名就係同你「傾Project」，實質就係知會你一聲，老奉要你跟佢個idea去做，功就佢領，鑊就你孭，仲慘過做妹仔。你想同佢講你個Idea？得，梗係得啦，咪俾佢ban橋囉！你個idea入面包含咗Lecturer講過嘅野，對正Lecturer胃口？Sorry喎，佢果堂走咗，佢呢堂又訓咗，總之佢無聽Lecturer講過就係你錯架喇，係咪好開心呢？
就當你決定忍佢，佢想點就點，但你想喺細位執一執？又Sorry嘞，（佢自己覺得） 佢諗野諗得咁啱，簡直完美啦，仲邊可能有細位會甩漏啊？肯定係你有眼不識泰山，唔理解人地嘅匠心獨運，走堂兼訓教都可以做到過三爆四嘅Presentation啦！真係夏蟲不可語冰！
咦？講下講下，你個Idea又完全唔用得，用佢個Idea啲細位又唔俾你執，咁你即係做咗啲乜？你唔需要知道，反正佢指揮你做野，你做就得啦，搞到一團糟，大家攬炒，咪明年再一齊take返同一個course, 繼續｢合作愉快｣，又有機會跟呢個大師級組員學野，再次長長見識嘞。
你以為呢種組員已經係「打大佬級數」？傻啦，陸續有黎，今日同大家介紹過有佢講無人講嘅「舢舨充炮艇類」組員，下一集將會向大家介紹「無尾飛陀類」，保證鑊鑊新鮮鑊鑊甘，敬請留意。
「Err……阿『舢舨充炮艇』同學，你諗住份野幾時做啊？我想快啲搞掂。」
「得架啦，我三兩下手勢就搞掂，韋海晴你唔係信唔過我下話？」