點解我拍TVB? 希望網絡人有轉機囉…如果大家有時間, 下星期一晚十點半, 可以喺TVB睇到一個唔係TVB製作嘅節目, 唔需要支持TVB, 係支持本土網絡人。
Posted by 司徒夾帶 on Friday, November 27, 2015
說實話，上個月的《網絡挑機》我看過了，
然後作為一個本地微型的「YOUTUBER」很失望。
這種失望一方面源自整個「挑機」的文化，
以及節目會/將會隱申至全港對 香港YOUTUBE令人失望的形象。
一）其實係挑邊個機？
雖然節目叫《網絡挑機》，但其實並無指明挑什麼機，或是挑誰人機。所以我作為觀眾先假設了： 被邀的YOUTUBER 是以「TVB的節目質素參差」為由到大台挑機，因為「TVB 節目無新意，無青年人觀看云云」，然後也預想YOUTUBER是以「挑戰TVB的節目製作，做出燴炙人口的節目」為重心去挑機。
換句講法，所謂「挑機」其實就係「依家TVB俾YOUTUBER話事，你地可唔可以拍出高質素節目?」這個Mission Goal 。一句到尾，好節目=挑戰成功，而差節目=挑戰失敗，而好壞交番由觀眾/網民定奪。
但節目中的「挑機」，姑勿論勝負，被設計成「一堆YOUTUBER要挑戰TVB( 的所有)，不僅是節目，包括人」，將對節目的矛頭，變成人。而對的不是節目編劇組，而係前線藝人。其實有無必要? 節目中被大眾聚光的「 YOUTUBER 挑 王祖藍/王晶/肥媽/李思捷機 」到底是否有出現的必要性？
撇開誰在節目中得到上風，這種對「人」的「挑機」在鏡頭面前有很大的弱點。或者咁講，就算節目裡面YOUTUBER相當有氣勢，功課做足，尖銳地將所有受訪者的痛處點出了，都唔會有好處：因為當你對著鏡頭。作為「攻擊者」的被動有二：
一、先撩者賤， 就算YOUTUBER在節目中面對不公平待遇，都得不到同情。說到底，是本著「挑人機」的心態去訪問，被挑者根本無需配合。 而即使辯者很強，很嘴炮：觀眾還是會覺得原來香港的YOUTUBER擅於批評，擅於攻擊，這真的是HK YOUTUBER想在主流媒體擁有的理想印象? 這點我將於下文重提。
二、節目質素與藝人的價值/人格很多時不完全相等。 我覺得愛回家唔好睇，唔代表黃祖藍唔識搞笑；我覺得掌門人唔好睇，唔代表王晶係影視界無價值， 我不是為他們辯護(無樓無資格)，只是「挑人機」的行為需要相當精銳，說服螢幕前的我於短時間接受「就是他/她令節目質素下降」。而其他什麼針對藝人背景、生平的攻擊，說出口其實很INVALID，很稚氣。
二）抽完水，好唔好笑？
前文提到，只要有人，無論你挑唔挑到機，你都自然會有一個「攻擊者」的印象俾觀眾。需要澄清一點，我唔反對批評，俗啲講，抽水。一個綜藝節目好睇，好多時需要抽水，因為咁先突顯到主持/參加者的價值，更何況呢個係以「挑機」作主軸的節目。
咁點解今次YOUTUBER主動抽水，但係睇落去柒過關家姐？
因為抽水的目的還是娛樂，而且多數不對人。你睇完MING 仔條《港女》，leo 條《九唔搭八》，伍分子D 《OLD NEWS》，你會笑，因為抽現況抽得中，拍出來希望觀眾睇完都會笑住反思，而且有根有據。
咁係咪只能對事，不能對人？唔係。綜藝節目中不乏擅於批評別人的人，但必須以「娛樂觀眾」為後盾，觀眾先會理解「哦，佢（地）係講笑姐」。例子如：森美小儀上下把、無限挑戰中的朴明秀（甚至整個無限挑戰），雖然句句到骨，但容易被理解為加強節目效果。 簡單一句，「不能認真，認真就輸了。」
《網絡挑機》中的YOUTUBER 定位為「攻擊者」，正如前文所言，無必要對人。如果要對人，必須尖銳。如果唔尖銳，OK，觀眾笑唔笑得出 ?
抽人水的同時，必須考慮到底你係想佢地俾你抽到同你道歉：「對唔住，我令TVB節目變差」定係「我要抽水等觀眾可以笑下TVB」。整個「挑機」誰先動真情，無論是不忿或憤怒， 只會被嘲以氣度淺，不諳世道。乃至最後一擊：「其實佢地都做得幾好架啦。」，被激怒的是你，得到諒解的是他。
三）YOUTUBER = 愛批評的後生仔
YOUTUBE = 很多這類後生仔的平台？
如果你睇到呢度，都會知道我係時候戴頭盔。因為實際上我鐘意YOUTUBE 呢個平台，亦訂閱過以上三位我提到既YOUTUBER ，所以呢篇文最後只會係一個微型YOUTUBER既感受，並非批評。
Eminleo：「香港人鐘意食花生。」，其實係講出左一個道理，就係Offensive 既片更容易吸引觀眾。《網絡挑機》就係一條花生片，無論誰勝誰負，要睇的就是兩邊互相攻擊，你踩我，我踩你。一部份人會覺得「YOUTUBER 快D 屌死TVB」、一部份人會覺得「都係 TVB 老練， YOUTUBER 不成氣候」，總之爆就好睇。
老實說，作為一個微型YOUTUBER，我既（啦，呢段係講個人感受。）想法是希望用YOUTUBE作為平台，希望我的片帶給人歡樂，而同時拍呢條片既人亦享受歡樂。
王晶果句：「你有無樓先？」都好似係同緊我講，但我唔介意。因為我可能要有樓先有30秒問答時間， 但係我唔需要有層樓先可以成為YOUTUBER，分享我生活的快樂。
所以第一段，當我講起「YOUTUBER」 呢個字既時候，我加左個引號。我更加希望大眾聯想到既「YOUTUBER」係正面的一群年青人，而唔係望一望周圍，發現同樣都係一個戰場，講邊個最有錢，講邊個最仆街。
我只係希望大家都會覺得香港 YOUTUBE 其實係可以咁。