「遇怪魔我即刻變大個」我細細個就聽過呢首歌喇。今年《數碼暴龍大冒險tri.》令熟悉嘅旋律再一次成為你我之間嘅話題。記得三色台播《數碼暴龍01》嘅時候我先係得小一。細細個，最想睇到嘅就係冚家進化圍毆敵人，果種感覺真係好爽好熱血。15年後，再一次睇住呢班被選中嘅細路，個感覺好唔同，睇到嘅野都唔再只係打黎打去。我發現我就係果個失去左勇氣紋章嘅太一……
當日靠著勇氣紋章，帶著一眾被選中嘅細路拯救數碼世界嘅太一，如今面對區區一隻古加獸竟然顯得怯懦——「不行……我一個人什麼也做不了……」。原來，勇氣係會隨著成長漸漸消逝…… 當一個人心目中嘅理想被現實一次又一次擊沈，勇氣﹑童真﹑創意，就會不經不覺流走。當內心嘅勇氣被怯懦佔據，我地仲可唔可以好似當初咁熱血去追尋自己相信嘅野呢?
可以。因為太一身邊有大和。
喺太一最怯懦嘅時候，大和不斷從旁激勵佢，幫逃避緊嘅太一重拾勇氣紋章，亦令最期待的畫面出現了 (唔洗發夢喇，唔係太一同大hehe) ——奧米加獸登場。
喺我地最怯懦最需要勇氣嘅時候，將我地從迷惑﹑空虛中拉番出黎，幫我地搵番個勇氣紋章嘅就係我地身邊嘅大和。太一同大和成日都嘈交，甚至大打出手，好重火藥味；大家都可能同佢地一樣。但最終我地會發現，大家都係一齊戰鬥緊。
喺你身邊嘅大和又係邊（幾）位呢？
不如同佢地講聲多謝哩～
遇怪魔我即刻變大個，多謝我身邊嘅大和。