港股策略王出咗sponsored post，封面故事係殘股大翻身，封面人物係蔡康年，我無睇內文，但我心諗：洗唔洗咁貼切。
蔡康年絕對係殘股。曾經係當紅DJ，因為施念慈報警話俾佢打，立即被貶為人渣，無得做DJ 走曬樣，從此淪為TVB 專用低能或變態角色。
近年因為有高清台，無記多咗財經節目，先知佢原來而家係財經主持。
點解係殘股？因為有一次俾人話你打女人，你就一世都係打女人。你知唔知打人事件係幾多年前嘅事？係99年。有無落charge？唔知。剩係知道佢告蘋果誹謗賠咗幾十萬。
又如何？Click 入個post 睇comment，啲八公八婆仲講緊呢件事，話佢打女人乜乜物物，彷彿身在現場。
因為一件從未證實嘅事，蔡康年失去咗嘅係電台嘅事業，電視嘅前景，今日佢只係上啲本地財經雜誌封面，你都睇唔過眼嘅，你唔係八婆，你係一個心胸狹窄嘅八婆。
好，你要八，我陪你。電台唔俾機會佢，蔡康年甘於喺無記做啲低能角色咁多年，終於算洗咗底，而家主持財經節目都好多人話做得唔錯，04年結咗婚有個仔，有報紙影到接放學話佢係24孝老豆。
至於施念慈，感情生活一直有傳媒報導，婚姻失敗後同個空少拍拖好似又散咗，開靚模公司賣寫真集（我應該幫趁唔少），最近屋企有失竊事件，菲傭墮樓身亡。
咁作為八婆應該覺得邊個可信啲？我唔知，我剩係覺得無乜事都真係唔好入娛樂圈。
睇嚟我都係無乜做八婆嘅天份。（其實寫呢篇野，係因為曾經有位朋友睇完蔡康年扮變態低B仔話佢好似我，somehow我無同佢絕交……）