乜而家睇頒獎禮有意義㗎咩？

我一直有個疑問，香港一個咁細嘅地方，無樂壇，無電視，電影變晒合拍，但有音樂有四個大型嘅音樂頒獎禮，仲未計其他乜春Roadshow之類嗰啲細嘅，電視台得一個做比自己員工，電影還好叫一個金像獎仲有認受性。但我真係唔明點可以做得到，市場容納到咩？有咁多歌揀咩？有好多歌手做音樂咩？電視我有選擇咩？

有人話其實都係鼓勵下業界啫，唔好咁mean，其實好好笑。大台拍爛戲，但頒獎比自己人話自己做得好，然後有班師奶同港豬就茶餘飯後吹水嘻嘻哈哈讚下呢個彈下嗰個又一年，咁鍾意其實可以喺公司攪個頒獎禮獎丫，最佳清潔大獎一定係公司個娥姐，得佢一個人做之嘛，有選擇咩？

OK fine，講樂壇。喂，等等，乜香港有樂壇㗎咩？咪玩啦。不如我問下你一年有聽幾多首歌先啦，都唔好講幾多隻碟嘞。你去卡拉OK，咪又係唱舊歌。香港樂壇係死咗，你一定要面對呢個現實，正如香港被中國收返之後其實已經死咗，唔駛成日Recap “This city is dying"好唔好？

不過我覺得頒獎禮呢家嘢真係好適合香港人，你睇下喺呢個多事之秋，一個叱咤就可以令到被失蹤人口嘅新聞淡化，李國章水鬼升城王做港大校董直情冇人再講。一個坤哥攞獎，就可以令大家放低對TVB嘅憤慨，當日話剪天線直到HKTV發牌嘅人，仲有幾多個貫切呢個信念呀？冇電視睇喎，唔得嘅，睇住先啦。港豬係點鍊成，其實你同我都明，當你發覺個社會有問題你係去諗係自己點適應個社會而唔係要個社會撥亂反正，其實所謂嘅「香港人」同香港一早就已經死咗。

唔講咁遠，講返頒獎禮。

有人話唔講TVB淨係頒比自己人，唔講新城同港台分豬肉，就講商台嘅叱咤。其實你唔覺次次商台頒獎都係呢幾個原則㗎咩？

1. 嗰排有話題性
2. 懶係獨立或者偏門
3. 個歌手同班DJ好撚Friend

我串啲講，你成日話新城分豬肉獎，TVB淨係比自己人，我切實咁認為商台咪又係一撚樣，啲獎分少啲啫，咪又係一樣圍爐。

我夠膽講如果唔係無線頒咗比坤哥先，商台一定唔會頒獎比佢，我只認同佢首原來他不夠愛我值得佔一席位，不妨留意，其實啲人好多都係buy佢個經歷夠勵志，話咩努力終於有回報。但我想講唔好意思，如果連努力都冇，想有回報係天荒夜談，而你覺得付出咗努力而冇回報，除咗際遇，好多時只係你嘅努力未足以有預期嘅回報。連呢個道理都唔明嘅人，返火星啦，地球唔啱你住㗎。

至於其他嗰啲歌曲獎，如果你問我上年我喺街聽到最多嘅歌一定係小幸運，淨係電話鈴聲我都聽到驚。大佬人哋連套戲上狂loop狂被人cover玩咗幾個月都仲唱緊Youtube過4500萬View但係叱咤十大一個位都冇，係呀佢明明有入圍，但個結果出嚟我以為今年淨係廣東歌先有得玩，吹漲！十大嗰啲歌除咗頭四首，即係無條件、世界真細小、最好的債同找對的人，呀仲有首羅生門，其他連聽都未聽過。你話叱咤專業？邊忽專呀？睇過。

所以有時你唔怪得啲人話香港樂壇同阿源一樣係零，圍威喂到一個點，咪只係活喺自己世界。今年主題好似係廣東歌咁，攪到冇晒國語歌入圍，連台柱林海峰都出嚟唱首「廣東歌」撐廣東歌，懶係惡攪但好夾囉。呢條橋，上年馬來西亞鬼才黃明志玩咗啦，人哋Pro過你好多囉。其實淨係計廣東歌不如唔好比國語歌入圍啦，但係又唔得呀，而家廣州都好多廣東歌喎，上年拾音社首Kiss Kiss Kiss 播到開巷咪又係一個獎都冇，廣州嘛，都係講廣東話但唔係香港人喎，又唔係好似張敬軒咁移民咗落嚟香港，比人投訴咁點算呀？

我真係唔知標準都唔知點定，但好意思話自己專業。

最後其實我想講嘅係，老老實實我上網聽歌多過聽電台，電台頒獎禮有幾有公信力？因為傳統？做開係咁？你話係就係囉。當媒界已經唔同以前，可能Youtube、KKBox、iTune、Spotify同Moov呢類平台仲可以反映到實際數據，香港人鍾意做開就一承不變咁做，其實先係香港好多行業嘅最大死因。陳詠燊先生有一篇文咁批評德高望重嘅譚校長，其中一段講香港樂壇嘅老本文化，我好深感認同。

香港樂壇的老本文化，正是毀滅香港音樂的其中一個始作俑者。上了位之後，就用名氣同一堆老歌吃一世，不思進步，不思進取。養到班消費者永遠停留在「金曲」世界，於是接受能力越來越低。

網絡年代啦，各位電台朋友，你要圍爐唔緊要，唔好掛自己幾有公信力同幾專業啦好冇？我肯肯定今年我聽呢首一定多過你叱咤十大任何一首，唱嗰個又靚，首歌又好聽又易上口（仲好洗腦），唱完一輪人哋仲出2.0版本係另一種味道添，兩個月唔夠500幾萬VIEW之嘛，唔多嘅。