（photo via cc Flickr user 老綿羊）
今日咁鬼凍，當然最啱打邊爐啦，於是我就走咗去吉XX。一去到，人山人海，煙霧迷漫，其實都預咗，咁我唯有排隊買咗嘢食先，因為印象中啲火鍋係會賣晒。落咗單之後當然要四圍搵位，其實好多人都同我一樣等緊位，最奇怪嘅係明明有大概七、八個位，不過全部都比啲「袋」坐晒。
遠望有張六人檯，有兩個港女對住坐，埋邊兩個位都放咗手袋，正當我諗住行埋去嘅時候，有堆人食完準備走，我當然即刻飛奔過去啦，點知我一行埋去，就有個自私男怒啤我話：「呢度有人。」我唔信佢有六個人，所以我問佢：「你幾多個人？」佢話：「兩個。」我心諗：「＿你吖！兩個人想霸六個位！？」當然我無真係咁講。之後佢仲特登坐中間，咁我唯有坐佢對面啦，因為我唔想同佢一齊坐，偏偏我坐個位就對正門口，食風食到傻咗，於是我就whatsapp男朋友呻咗幾句。
無幾耐有個可憐男捧住個餐過嚟問我有無人坐，我話我兩個人，佢就望向自私男，自私男又怒啤佢話：「呢度有人。」說時遲那時快，我男朋友就嚟到，佢以為我比兩個男人恰，所以就好惡咁問：「咩事！做咩事！？」我話：「無事，你去拎嘢食先。」可憐男就好可憐咁捧住個餐去第二度搵位，而自私男就死晒狗笑晒口咁話：「哦，原來你地都打邊爐呀？我地share用囉張檯。」我心諗：「張檯你買咗？而家你施捨我用呀？癡＿線，我先唔會坐呢個位幫你條女擋風，一有位我就轉！」
無幾耐可憐男就去咗兩個港女張檯度，想佢地拎開個袋比佢坐，佢地竟然唔肯！我完全估唔到點解會有人咁自私，個男人好可憐，佢繼續企喺佢地隔離，過咗一陣，其中一個港女好不情願，仲要用好鄙視嘅眼神，講咗句：「唉，比佢坐喇。」
唉，呢個世界真係乜人都有。