（少少劇透啦！不過我諗你未必會去睇，唔會介意嘅！）
坦白講，我係睇到佢個演員表先入場嘅！單係睇懷恩哥斯寧加畢彼特，再加埋基斯頓比爾已經夠殺。不過，點知最好戲嗰個竟然係史提夫卡維爾（Steve Carell）。
其實部戲兩個幾鐘真係有D長（我開頭太攰頂唔順瞓左陣），好多劇情可以去得快D，唔使要交待太多。不過由於呢部戲分左做三條軌，有時分開論述，有時就互相交錯，想詳細交待又要刻畫人物性格，外加一堆金融知識，所以被迫要拖咁多。因此坐喺旁邊嘅一對情侶嘅女士（得！我知道我好毒，OK？）都不時打喊露，或者細細聲問︰「佢喺度講緊咩呀？」我係知道答案，但解答呢回事，都係……這些機會不是我的.jpg，所以我就自己答自己啦！其實成個故事都係講緊呢樣嘢︰
話說有一個人為左賺錢而講大話呃左一個人，俾人呃嘅人為左令自己唔會蝕錢而講同一個大話去呃另一個人，用另一個人嘅錢嚟填返自己俾人呃嘅錢。自此一傳十、十傳百，同一個大話越講越多、越講越大，最終由於牽連太多太大，所有人包括政府都要話呢個大話係真。但係紙包唔住火，總有清醒嘅人去踢爆呢個大話。呢個咁大嘅大話俾人踢爆，後果一發不可收括，好多唔關事嘅人都要幫呢個大話埋單。而……主角就係踢爆大話嘅一班人，不過唔同嘅係佢哋可以喺呢件事上面賺錢。
點解人人都蝕錢而主角可以賺錢？因為金融市場其實就好似一個大賭場，你可以用錢賭一個賭客佢落下一注究竟係輸定贏，如果個莊家自己仲有錢賠俾你的話……而一眾主角就係趁莊家仲未破產前撈左筆。至於詳情係點，如果你不厭其煩的話可以入場睇，片中特色之一就係會將D金融理由用一D生活化嘅比喻重新包裝，然後用請D名人客串嘅方式講你知。唔想用八十蚊同兩個半鐘有多的話，可以用十分鐘睇下以下短片︰
我想講嘅重點係，雖然一班主角係仆街，但總算係一班有良心嘅仆街。因為當佢哋力排眾議，或者可以叫做「眾人皆醉我獨醒」時，佢哋係有講過俾其他人知「次按」呢個騙局唔穩陣（懷恩哥斯寧唔計啦！）。不過大部分人一定唔會理啦！因為普通人係唔會諗負面嘢嘅，因為大家鍾意正能量（樣？）嘛！好多嘢係唔會無端端變嘅！咁好天唔會無端端落雨嘅！個市唔會無端端冧嘅！我哋嘅自由唔會無端端冇左嘅！當有人講相反嘢！嗰位仁兄一定會俾人笑，然後話佢撥冷水，而唔會理嗰位仁兄講嘅嘢究竟有冇理據。但主角呢班仆街（特別係史提夫卡維爾）做緊用自己錢同全美國（甚至全世界）經濟對賭時，心裡面其實係好唔舒服。不過佢哋鬥唔過班普通人（因為連金融監管機構、（原本預佢係中立的）評級機構同政府都夾埋嚟講大話），所以唯有好仆街咁做D仆街嘢賺錢自保。
而點解呢班仆街講嘢冇人理？事實係成個「次按騙局」裡面，得最外圍、最遲俾人用同一個大話呃嘅人唔知事實，開頭講話「美國樓市唔會冧」、「買次按『債券』同相關產品嘅人想窮都幾難」嘅人，一早就知美國樓市遲早冧到仆街，呢個大話假到無倫。不過自己係既得利益者，唔靠呢個大話搵唔到筆大錢，冇得吃喝玩樂扑之餘仲冇啖好食，所以要繼續講呢個大話，最後連政府都要因為呢個大話實在太多人上當而要幫手講埋一份等佢遲D先被踢爆。你諗下呢班最初講大話嘅粉腸係幾咁粉。
我講左咁耐，其實你都知我唔係講緊套戲而又同套戲好相近，因為現實就如一場戲（你一定心諗我講乜柒）。其實由機場鐵路、高鐵、科學園……到第三條跑道、「全民退保」、一戴一露、「中国係一舊肥豬肉」（我諗講嗰條友都有脂肪肝），全部都係一個騙局。但係點解明知係騙局都冇乜人在意，或者一小撮人踢爆左但係一般人冇理？其實都係既得利益者作怪，就好似層壓式推銷咁（好似有D比喻不倫），唔繼續講同一個大話呃人，邊有下線做傻仔俾錢你洗？最慘嘅係，現實就好似「次按危機」咁，到頭來個大話真係俾人踢爆左，開頭講大話嘅人永遠冇事，而係由頭到尾冇信過呢個大話，或者冇資格俾人呃嘅人嘅人，往往就要承受最大嘅後果，因為blame the victims往往最容易（可憐的香港年輕人啊！），要搵真相往往最麻煩得罪最多人。片尾最後講到，性質同「次按債券」差唔多嘅金融產品今年又喺美國發售啦！呢種「按次債券」（個名我9up的！）又唔知cap左幾多錢去，所以話黑格爾真係講得好啱︰「歷史給我們的教訓是，人們從來都不知道汲取歷史的教訓。」
或者你會問︰我睇左你千幾二千字，同「一個大話就可以賺幾十億身家」有咩關係呀？其實我為左貼返套戲嘅主題，而設計左一個騙局，而你睇到呢度就落左踏啦！不如做個實驗，你照禁Like或者Share，睇下呢個騙局最終可以呃到幾多人？（讀者︰屌你！）