數香港地道小食，格仔餅一定榜上有名。
食格仔餅，醬料係其次，口感最講究：皮夠脆、餡軟得嚟實淨，方為上乘。要整得好味，烘餅時間要準：太耐會變乾餅、太短則無口感。蛋漿都有要求，格仔餅唔似得雞蛋仔咁一粒粒蛋咁多位，密度太低嘅話就會空心，唔好食。
悉聞中大女工依家都有得賣，咁啱入馬料水做野，身為校友自然順便幫襯下。一路睇住女工輕輕翻轉烘板，滿心期待公義滋味。點知，最後換嚟大大嘅失望。
咬落第一口，立刻聞到伏味：皮唔止薄，而且係軟嘅；餅芯則濕似蛋榚。心裡唯有寄望係「個別例子」⋯⋯
食多幾啖，直情想喊出嚟：成塊餅都係腍糍糍，質感好韌、咀嚼亳無口感，而個餡仲要虛嘅。似係直接用雞蛋仔蛋漿嚟整格仔餅，想唔難食都幾難。
望埋女工賣幾錢：盛惠十四大洋！即係咁，筲箕灣都有檔賣咁上下價錢，但人地整得正，十五蚊都值。但唔好意思，女工貴得黎又難食一大截，好難再回頭。更何況，石硤尾南山邨都有檔賣雞蛋仔，完全做到上乘格仔餅。估下賣幾錢？七蚊。
簡單一句：中大女工格仔餅，無下次。