請容許我以「痾屎」此詞作開頭，雖然此詞較為低俗，但如果轉成大便又覺得奇奇怪怪咁。
痾屎係一個人最放鬆既時候，我中學時期聽過黃子華係某個show講過，內容大約如下，有錯請糾正：
老闆：「阿強係邊到？叫佢黎我房！」
A同事：「阿強係廁所痾緊屎。」
老闆：「咁…咁叫佢痾完搵我……都係唔好啦，聽日先搵我啦！」
一個人痾屎同沖涼基本上無人敢阻你，就好似地盤佬（地盤工人）係三點三飲茶嗰時科文（管工）都唔會走埋去叫佢地開工一樣。痾屎嘅時間係最放鬆，甚至可以拎本書入廁所睇、拎部電話打機、或者係入面思考下人生，沖涼既時間多數只有一成時間係真正沖涼，其餘嘅時間都係唔知點解企左係到沖水，周身郁下，但感覺都係好放鬆，好似突然釋放所有壓力一樣。
小學時候會為左唔做功課而借尿遁，借屎遁，又話身痕又要飲水，所有動作都係為左逃避眼前既功課，但最終都係要做功課，功課唔會因為去痾個屎就做完。去到中學要考公開試就明白依個道理，將沖涼痾屎食飯既時間減到最少，所有時間放哂係讀書上面，一直上到大專就開始明白痾屎既重要性。
大專chur讀書、chur project、chur返工等等，好多時食完個早餐就要開始做野，係嗰一刻好想懶一下，逃避一下，嗰個時間就會走入廁所，舒舒服服痾返篤屎。沖廁一刻我就知道，我要再繼續面對現實，繼續做我應該做嘅事。
上年暑假返intern十分辛苦，室外工作，好多時做做下都係走入廁所，唔好話係偷懶，只係想休息一下。入到廁所發現幾個廁格都有人用緊，其實大家都係只係想抖下，有邊個想日做夜做搵得嗰萬幾二萬蚊？
香港依個地方就係返工，食飯，繼續返工，放工，食飯，訓覺，第二朝返工，可能壓力大到準備爆都未知，情況有如溫水煮蛙，終有一日會不知不覺地抑鬱。
香港人，壓力大並唔係你嘅錯，係環境令你需要咁大壓力下工作。你睇其他國家，有邊個國家一日做足八、九個鐘？一星期五、六日工作，仲未計開OT嘅時間。
有時間就放鬆下，搵適當嘅減壓方法，對住個海大叫又好，跑步又好，聽歌又好，打拳又好乜都好，都好過淨係得痾屎同沖涼嗰時先有得放鬆，順祝各位身體健康，事事順利，輕鬆過每一日。