有時行超級市場，除咗望吓食開幾款零食有冇特價，我成日都會諗一個問題。有堆零食或餅乾買黎試食過一次，難食到一個難以置信嘅地步，究竟有乜人會買佢？佢哋嘅生存價值喺邊度？
今日，呢個謎底終於都解開咗！！買佢哋嘅人，就係公司嘅「零食部同事」。
零食部多數都係由人事部門分拆出黎，其實係可有可冇，只係老闆覺得咁樣做會增加員工對公司歸屬感，等你班奴才ＯＴ就無咁多怨言…「肚餓咪食零食囉！唔好叫外賣呃ＯＴ錢添啊！」但老闆總係唔明白，ＯＴ錢根本唔夠買一個飯盒…
話說前幾日，每個月尾公司都會召晒所有員工入房開會，睇吓公司內部有乜需要改善，點知一開始已經開火鬧人…
「Kelvin仔啊！你咁搞法唔掂喎…點解成日可以做錯嘢？」同大家介紹返，Kelvin仔有訂錯咗3000卷保鮮紙嘅驕人戰績。今次佢又錯乜呢？後來我聽返都幾好笑，值得用一篇文黎笑佢，所以留待下次講。
「不過今次你好彩，Touch wood 個客無追究。」老闆一邊講一邊拍枱。
老實講，講touch wood然後拍枱呢個行為真係好弱智。次次見到有人咁做我都覺得作狀到打冷震，不過既然係老闆做，我就輕笑幾下。
「另外，Mary妹今個月零食費用用咗幾多錢？」老闆問。
「今個月用咗幾十蚊咋。」
「Mary妹妳真係全熟牛！Kelvin仔你真係要學吓人哋啦！」
「咩、咩叫全熟牛…」Kelvin真係蠢，竟然開口問。
「Well Done囉～哈哈哈哈！」老闆笑，我哋成班跟住笑。
接下來個會就以好歡愉嘅氣氛結束。其實以前Mary會去阿信屋買啲佢自己鍾意嘅日本薯片同朱古力，不過唔夠一個星期就畀公司同事掃晒，結果月尾零食費用超支，老闆就鬧到Mary一臉屁。於是Mary就諗咗個方法，點樣Keep住公司有零食，但又控制到成本。
方法就係買好難食嘅餅乾，包餅放咗成個月，完全無人掂過。打開個零食櫃，唔講以為Mary係百佳粉絲，全部牌子都係「佳之選」。從此以後，公司個零食櫃就好似各大商場嘅空中花園一樣。
個櫃的確係有零食免費供員工任食，個花園的確喺頂樓同埋有花…
但零食無人食，花無人睇。有乜意思呢？其實無…做個樣交到差，就足夠了。
唔止死物，呢個社會上有好多人都係一樣，你唔能夠否認佢存在，只不過有冇存在嘅價值呢？無！
結果，每個員工都係各自買返自己嘅零食，亦都唔會對公司存有歸屬感。