得罪講句，八達通報失系統係垃圾。
是咁的，我不嬲行瀟灑路線，搭地鐵為求方便，入閘後拍完張八達通後就咁放入褲袋。結果係點？梗係唔見咗啦，咁都好小事啫，張卡好似得一百幾十蚊。
作為絕種細心好男人，冇咩經驗唔見嘢，於是走去櫃台問職員，佢叫我去港鐵失物認領處，咁個認領處喺邊呢？我xxxxx，喺閘外，即係我要出去報失後再俾錢買飛入返去。去到認領處，處女職員mark完我個名，就俾咗個電話叫我，叫我打去八達通公司報失。我咪跟住佢打囉，搞完一大輪終於報失成功，可以抖抖，心諗希望過幾日地鐵黃衫佬會搵得返啦。
翌日，天公造美，但見萬里晴空，四海無波，我踏出街外，頓時日麗風和，唔通有好事近？果然不出所料，即時收到一個電話，係港鐵。
「喂，先生，我地搵到你張八達通喇」，我欣喜若狂，難掩暢快心情，飛快去拎返。
去到個職員話：「你有冇報失到？報失就用唔到咖喇，開唔返。」
Huh？報失就用唔到？我理解係怕俾人偷咗張卡，亂用d錢，但唔解搵返會唔俾開通返？？根據《現代漢語辭典》，「報失」意指「向有關機關，報告財物丟失，以便查尋」，我丟你咩識唔識中文？個名邊個諗？點解叫報失？點解係叫報失而唔叫cut卡呀你老味！
於是我又打返去補領，我認自己傻西瓜，唔記得咗mark低「報失編號」。話說補領係打去報失熱線按電話3字，話要輸入「報失編號」但我又唔記得；嬲嬲地按1字報失報多次，又話我唔正確；咁我按返2字查詢報失資料，屌你又話要「報失編號」，我果刻就好似跌入時間裂縫咁，卡咗喺地獄無限輪迴，電話撳到冇電都未撳完。
好啦，搵到客服啦，點知又話五天工作，喂呀哥，唔洗返工咩，邊有時間呀，講嘢！幾經辛苦，終於得閒，轉打第二條線搵到個真人對話，又攪咗一大輪，總之最後係補領唔到張卡。
職員：「先生你仲有咩需要？洗唔洗退返餘額俾你 :-)？」
我：「好呀！仲有幾多錢？」我重燃希望。
職員：「你張卡仲有$4.3 :-)。」
我：「…………」 「咁張卡果50蚊按金呢？」
職員：「先生，我地嘅報失手續費係要50蚊嘅 :-)。」
吖，八達通公司你真鬼馬，我報失變cut卡已經冇咗張卡好慘豬仲要收晒我50蚊按金然後你話退返4個3俾我？不如封俾你做帛金啦。
至於最後我有冇八達通用？我都唔知，耶穌都復活咗，搞L到佛誕都未有。
我以後唔搭交通公具。