開天窗第一，公信力第一

星期六晚上十點，鍾先生返到辦公室。

佢嘅秘書見到佢，好驚訝咁問：「咦，鍾生你唔係放緊假咩？點解你咁夜仲喺度…」

鍾：「啲專欄作者又玩開天窗，話要捍衛新聞自由喎。唉，又要我出面去調停，本身今日仲約咗個 friend 去食雞煲…」

秘：「啲專欄作家要玩嘢，咪搵過第二啲人寫囉。我哋大把人投稿啦，使乜驚喎。」

鍾：「唉，你識啲咩吖。好彩仲有呢啲專欄作家搞『抗爭』咋！冇咗佢哋，我哋嘅『公信力』只會繼續插水。再咁落去冇人睇架喇，仲講咩新聞自由吖…」

秘：「上頭唔嬲咩？而家啲人講到公司係為咗政治理由炒咗姜生喎！你由得啲專欄開窗，咁咪即係默認？」

鍾：「我同上面解釋咗架喇。我哋專欄越多『抗爭』成份，啲中產讀者就越開心，銷路就越好。不過上面又話咩『報格』又話乜乜乜，明明唔係事實，點解要默認？ 咁好啦，我咪叫啲手足加返句『編者按』囉。」

秘：「吓？咁都得？」

鍾：「唉，冇計啦。以前就話辦報要報道真相、講真話。家下為咗生存，唯有迎合讀者口味。佢哋喜歡天窗，咪開多幾個出嚟囉。否則業績繼續差落去，下一個炒嘅就係我…… 啊係喎！聽朝提我搵人約 Audrey、阿姿、森哥，請佢哋食返餐好嘅。如果冇佢哋配合，呢單嘢都唔知點收科。呀，當然唔係我出面請啦，我坐得呢個位梗係做醜人……」

秘：「……」

鍾：「今日就咁先啦。頭先嗰番說話，你就當冇聽過啦！聽日見！ Good night！」