闊別多時嘅輔仁中國組（自稱）又嚟喇，今次講下，武漢湖北工業大學日前發生咗件咁嘅事：
某日大學體育堂，不知何故有隻牧羊狗闖入想玩波，咬爛晒啲籃球。學生持球不放就畀狗追，最後不得以召來保安。
保安驅趕大狗無效，捉狗亦失敗，最後見大狗發惡，決定開保安車撞狗。輾咗一次，冇畀狗追嘅人聽到狗慘叫，就過嚟阻止個保安，個保安就屌鳩班學生繼續輾。及後終於輾咗四次輾到隻狗重傷，班冇畀狗追嘅人又唔畀保安執走隻狗。不過最後保安都係執走咗隻狗。
事件上咗網，又吸引咗群愛狗人士嚟嘈，大學校方網上詳列事件緣由並致歉。愛狗人士唔理，吹雞去湖北工大抗議，最後發生小規模衝突。
星島日報聲稱呢隻一口叼得起個籃球嘅狗係「小狗」
件事就公說公有理，婆說婆冇理嘅，因為打狗一定係錯架嘛。
中國人一大特質，就係鄉愿，蠢蠢鈍鈍懶係正直，總之打狗就唔啱、總之講粗口就係錯、總之反政府就唔得。唔係話西人唔會鄉愿，但似乎鄉愿喺中國社會係特別嚴重。
睇返呢件事，我問過一啲大陸網友嘅睇法，有位武漢人就咁講：「住得嗰區嘅狗唔會咁爛身爛世，呢隻應該係有皮膚病甚至係瘋狗症，捉走係正常，打死都唔恨。」我又唔係話打狗啱，但係當有隻咁嘅狗，追住個後生仔，身為保安又出盡法寶都制唔住隻狗，開殺戒，我認為係無可厚非嘅。
但係唔知前因又唔理後果嘅「路人」同「愛狗人士」就唔會咁睇，佢哋眼中只係見到保安開車撞狗，「總之撞狗就唔啱」，完全冇思考過點解會撞隻狗，同埋唔撞隻狗會有咩事發生。
＝＝＝＝＝＝＝＝＝＝＝＝＝＝＝＝＝＝＝＝＝＝＝
點解今日要講呢件事呢？呢件事同大陸人對待香港問題嘅態度其實係好似。上文提過嗰位大陸網友，以及其他好多大陸網友，即使係去過外國留學，對待香港人抗爭嘅態度，都同事件入面嘅非當事人同愛狗人士好相似。
當佢哋見到香港人七一大遊行，就會同你講：「做咩香港人要落政府面？你有咩不滿搵香港政府傾囉，總之搞政府就唔啱！」
當佢哋見到香港人光復廣東道，就會同你講：「做咩香港人要打遊客？你有咩不滿搵香港政府吖嘛，總之搞遊客就唔啱！」
當佢哋見到香港人佔領旺角，就會同你講：「做咩香港人要塞住條路？你有咩不滿咪遊行囉，總之塞路就唔啱！」
當佢哋見到香港人魚蛋革命打差佬，就會同你講：「做咩香港人要打差佬？你有咩不滿和平佔領囉，總之暴力就唔啱！」
當佢哋見到香港人傾獨立，就會同你講：「做咩香港人要搞獨立？你有咩不滿咪同政府拆掂佢囉，總之獨立就唔啱！」
你真係會想同佢哋講：「好聲好氣講過晒啦，屌你老母唔知乜頭乜路就咪撚插嘴啦！」呢個時候佢又會答你：「總之講粗口就唔啱！」
佢哋好中意加把口，但又咩都唔知；就算之前係知，佢哋都唔記得晒，或者扮唔記得晒。就好似呢件「保安撞狗事件」咁：當事學生係香港人、個波係香港嘅價值，隻狗係中共，而保安就係要保護香港嘅香港人；當保安用盡一切方法想救香港人：單車趕佢唔走、捕獸器捉佢唔到，咁唯有開車撞狗，其他學生，即係仲未畀狗追嘅香港人，見到隻中共狗慘叫，就不問緣由嚟阻止保安打共狗，話咩「會整親共狗」、「唔好整親隻共狗」；事後一群事不關己嘅愛共狗人士，更加出嚟示威，抗議保安打共狗……
佢哋只係當時出嚟做下塘邊鶴，根本就唔打算過問點解要打狗，然後就係嗰句：「總之你講粗口就唔啱啦！」。所以，當要出手嘅時候，根本就唔應該去理佢哋。打死咗條共狗之後，任你班事不關己同學仔同愛狗人士點嘈，隻共狗都唔會翻生架啦。「唔好落共產黨面」？間學校道埋歉啲「愛狗力」都要嚟搞事嘅，你畀面佢做咩啫？
不過，你唔好以為只係大陸人係咁，香港人都一樣──
「做咩要搞民主黨佢哋呀？佢哋做錯嘢咪改囉，總之搞佢哋就唔啱！」
「做咩要玩黃之鋒佢哋呀？佢哋做錯嘢咪教囉，總之玩佢哋就唔啱！」
「做咩要屌民建聯佢哋呀？佢哋都自認本土啦，總之屌佢哋就唔啱！」
「做咩要笑鄧小樺佢哋呀？佢寫得難睇咪執囉，總之笑佢哋就唔啱！」
係囉，大家都係中國人吖嘛……