人類本來就係動物一種。人類嘅知識都係源於求生。由最基本嘅慢慢發展成為複雜嘅、多變嘅、更高層次嘅知識同技巧，之後成為各方面嘅文化。由此推論，傳統智慧係教育下一代去趨吉避凶。所以，當應尊重傳統、理解傳統、學習傳統，欣賞傳統。
生活，應該係一種文化傳承，至少一部分係。定焦香港，我認識嘅傳統係一種由書本記載由一小漁村轉變成轉口港、到老一輩口術戰後輕發展工業嘅城市、到親身體驗成為金融中心嘅香港，嘅城市發展中市民為咗生存而隨機應變而形成嘅生活方式與態度。當中就係一種非常明顯、強調「物競天擇適者生存」嘅生活方式。一種充滿爾虞我詐、屎忽鬼、老屎忽、仆街⋯⋯ 醜陋百出卻理所當然嘅傳統。
懷着理想嘅人仍有，但要得到社會認同嘅只係搵到錢嘅人。過去二十年，「地產霸權」被提出，開始被理解為香港社會種種問題如貧富懸殊越嚟越大、樓價高企、醫療福利、教育質素下降等嘅原因。地產霸權嘅存在某程度肯定咗「物競天擇適者生存」呢種醒目仔、執生、走精面嘅社會價值，一種投機嘅生態。要致富，識時務懂投機買中咗就 ok。呢種就係香港嘅傳統。
當投機活動令消費品推到價格爆破嘅臨界點嘅時候，社會上得唔到資源嘅一方就會反抗。喺香港，所有嘅資源包括時間、土地等都係消費品。年輕一輩往往係被人食住嘅一眾。所以，經濟唔好嘅時候，正正係年輕反傳統嘅時候。一種對抗因「物競天擇適者生存」概念而形成嘅傳統，嘅「物競天擇適者生存」條件反射社會行為。
此時此刻，傳統教曉我地反對傳統就係一種求生技能。社會撕裂，由佢撕裂。香港係時候要改變。