最近我係網上睇左一篇文。文中筆者既主旨，其實得一個，就係股票，你唔識，唔好短炒。因為炒左，就會燶，而燶左，就會血本無歸。股市一個周期，跌三五七成，係尋常事。咁係呢一方面，我係絕對同意筆者既意見。就係後生細仔，又無錢，又唔知道股票運作，倒不如儲下錢，壯大自己財政實力，敬而遠之先。但係咪咁樣就代表，你唔能夠將時間「浪費」係股市上呢？
或者我作為從業員，都應該出黎，講番句公道說話：恕我唔能夠同意呢個講法。
點解？因為大家係人生上面，去到最後，都要識得點樣運用自己既錢，去搵更多既錢。一係，你就努力打工，好似我咁一日OT到黑；一係，你就去做生意，諗條絕橋去賺人地既錢，然後發達；再唔係，你就要學識投資。而投資，係一件長遠既事，要一直學到老，而且，並唔係一朝一夕。依家強積金變成垃圾，全民退保又只係空中樓閣既時候，投資，係自身財富既極其重要一環。
我想講，講呢行，我係唔係吹廢水的。IMF依家估緊全球經濟增長3%，係另外一次既Downgrade，基本上無一次佢唔係將自己既Forecast downgrade，經濟唔好，通脹低，人工唔加。但係你擺舊錢係銀行，接近零息，一樣唔會有任何建樹。近十年既通脹係大概3%，近年再低d，係2%。換句話說，就算幣值不變，你既財產每年會有2%既減值。一萬蚊，唔見二百蚊。但一百萬，就係唔見二萬。更加唔好睇輕十年計既Compound effect。
買樓，大家都買唔起，而且樓價係大跌緊。商品價格，風險太高；債券市場，香港無咩選擇；如果買基金或者Unit trust，你亦都唔想俾人食Management Fee，咁到最後，你都只可能買股票。至起碼，都有 D 派息可以保值呀。
係，揀股票要好心機，同埋好難，而且有時係會買錯。但買股票，同炒股票，係兩回事。同埋，只係永遠集中係本地市場，同放眼係世界市場，亦係兩回事。筆者講股市自上年七月起跌左好多，A 股又跌左好多，之餘此類。但另一方面，佢無講到恆指自今年起已經升左超過3-4000點，當中已經有不少藍籌股有超過10%既反彈。而唔講本地，講外國，美國股市，甚至到依家為止，係升足七年，自從QE以來，道指創新高，去到18,000點。一 D 大型科技股，例如Facebook 、 Apple，都有發癲既增長，到依家先有回落跡象。
咁你又唔去嘗試去做功課，去攫取當中既機會？講到尾，買股票，輸，得幾個原因：懶，唔做功課，人云亦云，過於短線。
我以上既幾個引例，旨在說明，我地唔應該太偏頗去睇股票市場。有賺，就有蝕，唔係呃人，係有利益既地方就係鱷魚潭。呢個世界無Free lunch。但如果你要分一杯羹，所有既投資工具，你都要識，咁樣可以知道點樣靈活改變自己既Strategy 同埋 Portfolio。
就咁叫人遠離股票，而唔係嘗試去理解，去操作，係不太負責任既做法。等於有 D 藥有副作用，但係可以治到病。我地係應該細心研究份量，而唔係：大家以後遠離藥物啦！