想放假使乜靠「請假攻略」？

大概在每年的四月，政府都會根據《公眾假期條例》在憲報公佈下一年的公眾假期，而今年四月廿九日憲報就公佈2017年的公眾假期。當然如果要增減公眾假期的日數就要經過修例，所以上年九月三日「抗日戰爭勝利七十周年紀念日」只是一次性的安排，想下次九月三日有假放？可能等到七十五或者八十周年先再有啦！

在憲報公佈下一年公眾假期，是因為根據《公眾假期條例》如果那十七日的公眾假期萬一碰正星期日，政府會講明會另訂一日作特別補假，以確保除每個星期日外，非周日的公眾假期日數肯定有十七日。例如2017年一月一日是星期日，就會將一月二日星期一補放一日假；或者2017農曆年初一至年初三有一日是星期日，所以會特別在年初四補放一日，包保大家唔會「年初四咁既樣」啦！

當然學生或者不少白領，通常都可以放足十七日公眾假期或者叫「銀行假」；但有部分人，特別是藍領或服務性行業，只是放十二日俗稱「勞工假」的法定假期，比「銀行假」少五日之餘，更可能要在假日上班而需要作補假安排。在此就不講爭取多五日「勞工假」的問題，只是知政府一公佈下年的公眾假期，不少傳媒或網站就很快根據分佈，計算出例如「只要請三日假就可以連放十日」等等這種「請假攻略」，當然你現在輕易找到2017年的「請假攻略」，其實2016年仲有八個月先完，今年的事都仲未搞掂，咁快就諗定下年？

不少人當然希望有長假期，農曆新年、聖誕節，如果你好彩連復活節都有得放，就會是離港外遊的高峰期，旅行組團的旺季。雖然「請假攻略」設計得非常完美，但實際就是「你老母，哪有假？」或「你老母，哪會批？」其實如果是長工，除了法定假期，一年都至少有七日法定年假，有幾多個真的可能跟足「請假攻略」去攞假呢？

一般人一星期返工五日或六日，每逢星期日或公眾假期，除了離港外遊，亦有不少人選擇在假期去郊區或離島玩。當然一兩日假期影響郊區或離島居民就可能不大，但一遇到長假期，尤其是復活節或聖誕節長假，不少平日水靜鵝飛的地方，在不少郊區或離島就會旺過旺角，等巴士或渡輪同平日逼返工放工差不多，作為外人辛苦一兩次睇落無所謂，但有時就會令當地居民叫苦連天。

長洲可以講不少香港人都鍾意去的離島，每年太平清醮及搶包山都會吸引不少人專乘欣賞，但去到復活節長假期甚至試過有復活、清明一齊連放的超級長假期，過萬人一窩峰堆在中環碼頭等幾個鐘船到長洲；玩完在長洲碼頭又要等幾個船先返到中環，令不少長洲居民叫苦連天，提出「長洲人優先上船」，甚至搞笑到要求「長洲獨立」。

其實每逢長假期出外旅行團團費特別貴，到離島或郊區又會特別多人，既然放假的目的就是輕鬆一下，何不在淡季趁人少團費平去旅行？或者在平日到離島或郊區，真正可以享受一下清新空氣呢？其實每過二十四小時，就有一日會過去，與其跟「請假攻略」去人放我放，不如自己可以選擇一些平日去休息，令平凡的一日都變得完美咪仲好！