尋晚睇G1格鬥會Rika鬥Winkie，簡直令我諗起「美女與野獸」五個大字。明顯地美女一定係Rika，至於野獸Winkie 亦係我個人感覺，無辦法佢第一場對阿旦未開波之前果個野獸般既「依牙鬆鋼」樣一直係我腦海入面揮之不去，老實講我好後悔睇到呢個衰樣，而呢個衰樣既主人竟然係同Hotcha 其餘兩個歌手係同一個組合共事過。
講返場比賽，驚喜在於靚女Rika既拳法同距離感超乎想像咁好，幾下間佢左手撳低對手雙手再發右拳，而且腳步好有節奏感，閃身靈活，令對手不自覺咁跟隨左佢比賽步伐。呢樣野其實係一個運動員係個人對決時最重要既一個技巧，帶住對手黎進入自己熟識既節奏咁對方就會不期然咁露出破綻，駛唔出自己訓練時既功力，賽車如是、桌球如是、就算連賭博亦如是。
三round 比賽入面最精彩既係第二round Rika 既主動takedown，呢次地戰入面雙方都努力嘗試去索同反鎖，而且最激勵既畫面就係Rika係拆鎖既過程入面俾隻野獸打左十幾下「兜錘窩麵」，最後Rika解鎖成功繁瑣野獸，但因為Rika 攻擊後腦而被拳證分開。
最後Rika 以58:59落敗，雖敗猶榮。但當中具爭議性既係野獸係接受訪問時同Rika 今早係Facebook 引述既「我已經留左手架啦」呢一番說話。
係運動比賽入面體育精神大於勝負，而呢種說話簡直就係侮辱同挑釁。賽前訪問Rika 既時候佢講明會全力以赴，呢個係一個運動員正面既心態，表示佢唔會做假、唔會掉以輕心既同時亦尊重對手、尊重比賽既體育精神。無論係賽前同賽後、無論係得勝或落敗，都應該交出呢種體育精神。姑勿論Rika 最終落敗，就算Rika 係勝出而同樣換黎野獸一句「我已經留左手架啦」同樣係一種極大既侮辱。
運動比賽有高有低，你實力比人強當勝出係理所當然，但「我已經留左手架啦」呢種態度同論調應該被譴責。大家試試將自己喜歡既體運項目既人名、隊名換上Rika 同野獸既名字，你自然會體會到「我已經留左手架啦」難聽過「屌你老母」！！
縱然野獸贏左呢場比賽，但絕對唔會贏得任何尊重。睇呢個真人show 既預告可以知道佢已經輸左友誼，睇黎佢甚至輸埋觀眾既掌聲，一個藝人係電視機前面輸左質素，我希望佢係呢個節目裡面快d 消失。
另外今日係Rika Facebook 既貼文尾段得知佢要退出娛樂圈，作為觀眾既我希望佢「勿忘初衷」，上得呢個節目除左話要挑戰自己之外其實都係想多d人認識，然後幫助到演藝事業既發展。如果單純要挑戰自己老早去參加泰拳班就得啦駛乜俾人打到豬頭咁呢？希望呢個靚女Rika 可以深思熟慮難得節目出家之後咁多香港人認識你咁多工作機會，無味讓教你既教練、支持你既觀眾失望嘛。