Chateaubriand steak，堅好味。
上星期遊日本廣島，印象最深刻嘅唔係傷亡枕藉嘅原子彈，唔係在水中央嘅嚴島神社，而係一間鐵板燒。
旅程中有一晚兩條友唔知食乜好（事實上我地每朝起身第一句都係問「今日食咩？」），響hostel附近見到一條巷仔大字招牌寫住「飲食街」，即管入去八吓，原來全部都係餐廳仔，有居酒屋、有壽司店、有中華料理。居酒屋同壽司店都坐滿晒人——即係圍住bar檯同店主大約八個人——千里迢迢去得日本又冇理由食中華料理，於是我地入咗一間冇人嘅鐵板燒。
真係冇人，一個客都冇，老板用電話睇緊廣島棒球隊Carp對唔知邊隊嘅球賽。一見我地入嚟，老板就熄咗電話，招呼我地坐低，響同佢合作無間嘅大鐵板前面。結果我地由第一道薯仔沙律燒，食到最後一道野菜鐵板拼盤，都係猶如包場，得我地兩個客。
老板——應該好似《深夜食堂》小林薰咁樣叫Master——身穿一襲白色嘅廚師服，頭頂包一條白毛巾，花白嘅鬍鬚，熊腰虎背，隱隱然已經知道係高手。我地每點一道菜，佢都施施然由雪櫃拎材料出嚟，彷彿響大鐵板上變一輪魔術，就擺到我地面前。一道雞肉芝士串，材料就係芝士同嫩雞（ササミ，雞胸肉入面果一條比較嫩嘅肉），先將芝士碎鋪上鐵板溶咗佢煎成片狀，再放雞肉串上去，等芝士底部稍稍煎到變啡色，就捲起包住雞肉，再響上面灑少少胡椒，咁就完成。
味道無得頂，不過店內氣氛同隔籬幾間鋪嘅喧鬧實在太大對比，於是我趁master整完雞肉芝士串嘅空檔，好老土咁打開話題，「我地係香港嚟嘅」，本來就一臉認真烹調嘅master笑起上嚟，開始講話聽聞香港好多美食，不過佢未去過。Master一個中年大男人，把聲竟然溫柔又磁性。
「香港啲餐廳大好多，一係就連鎖店，冇乜你呢種一人鋪仔。」於是Master話，佢地呢啲一人鋪仔，以前呢，好多都係退休公務員、讀唔成書嘅人，或者唔知自己有咩好做嘅人開嘅。不過而家就唔同，好多都係因為自己對料理有興趣所以開鋪，佢自己都一樣。難怪咁好食。
餐牌
我見到牆上餐牌最貴果樣係「牛ヒレのシャトーブリアン」，唔知係乜，master話「即係牛柳最正果部份」。跟住佢煎出嚟，真係又香又嫩，2500円絕無欺場。後來一查，原來即係Chateaubriand steak，堅嘢嚟。
最後嘅野菜鐵板拼盤，一樣係驚喜。冬菇、山芋（即係淮山）、蓮藕，好簡單嘅食材。冬菇、山芋都係就咁煎再淋上醬汁，蓮藕就用鐵板鏟切粒，醬汁之餘再加上牛油、芝麻香煎。
各有千秋嘅野菜鐵板拼盤
我地以為master用咗唔同嘅醬汁，點知佢話，全部係同一枝醬油。同樣嘅醬油，搭落唔同嘅食材度，就帶出唔同嘅鮮味。呢啲就係功力。
由我地開始食，到我地走，咁啱都冇客人入嚟，我地好似包場咁。結果回港前一晚我地再去encore，果晚高朋滿座，識嘅唔識嘅都一齊傾一齊食，又係另一種經驗。最重要係，有得睇住master手藝，豁出去咁叫嘢食飲啤酒，同其他食客傾計，盡興而歸，都係每人200幾蚊港紙。香港？求其食個放題都冇咗，仲要係冇質素嘅。
望落up dup嘅飲食街，裡面有正嘢。
我地睇《深夜食堂》好羨慕一個咁樣嘅心靈避風港，其實呢種放工去食少少嘢飲兩杯吹吓水，就係人地生活嘅一部分。香港有冇類似嘅嘢？或者形式唔同，但係街口事頭婆記得你鍾意A餐凍啡少甜嘅茶記，次次去親都送杯豆漿過你嘅車仔麵，除咗執笠果陣嗌幾句「地產霸權」之外，我地又有幾珍惜過？我地有冇幫手營造一個空間，俾有心機嘅廚師一展所長，而唔使單單為咗生存而犧牲品質？
儘管隔籬飯香，香港嘢都好好食㗎。
鉄板料理みかど
広島市南区猿猴橋町5-16飲食街駅前横丁内（広電猿猴橋町駅徒歩1分）