見天氣開始熱，諗住放工去剪個清爽嘅髮型，點知剪開嗰間髮型屋執咗笠，隔離街開咗間新，就入去試一試。
一入到去見個髮型師衣著時尚，個頭成個張智霖咁款，笑容滿面走埋黎，問我「先生幾位，MARK開女定仔？」我都唔知畀咩反應佢，咪話「一位，淨剪髮。」
洗完頭佢問我想點剪，我話想兩邊同後面梯形鏟青，頭頂同執陰都剪少少就夠，唔想要柏豪頭。為咗令髮型師更清楚我講乜，我特登畀咗張相佢睇，唔係咩明星相，係我上次剪完頭髮影低嘅，咁就實無死啦。
「OK明白無問題，即係成個韓星咁款啦～」
「咪住先…你講邊個韓星？」
「好出名嗰個咩基囉。」
「韓男宋仲基？」我確認我同佢講緊同一個人。
「係喇！就係佢！你係咪想剪到佢咁？」
「又唔洗咁短…」
「嘘！男人講呢啲～OK明白無問題！」髮型師對住塊鏡做咗個OK手勢。
我有近視，剪髮要除眼鏡所以睇唔清剪成點，雖然髮型師搞嘅gag唔多對路，但唔可以因為一個人搞爛gag就判斷佢剪得差…
佢一手拎起電鏟，另一隻手好佻皮咁拎住把鉸剪喺手轉咗幾圈，佢話「我哋黎個激啲嘅！」
我正想講其實可以保守少少，佢已經揪起咗我執頭髮，由下而上一嘢鏟上去！
「哎呀！」佢喺度捽眼…
「你做乜啊？」我感覺到半邊身都輕咗。
「你啲頭髮彈到我隻眼。」
「……」我問佢做乜一嘢鏟咁高，佢竟然怪我啲頭髮彈到佢隻眼？！
「唔洗鏟咁高…」
「兩邊要平衡嘛！得啦，我知你想要乜…」
望住啲頭髮一束束咁跌落黎，個髮型師仲要一邊剪一邊「喲喲喲」咁製造音效…我終於明白，點解啲藝員拍戲剃頭會流眼淚。
剪完個頭，我戴眼鏡照一照鏡，若果將我個頭化成象形文字，一定係性器官黎。
「我想問…你究竟知唔知邊個係宋仲基？」
「知啦～我好鍾意聽佢唱歌～」
「唱歌？！」我虎軀一震。
「係啦～我畀幅相你睇。」
佢用手機搵幅相畀我睇，
你老味係鄭中基！！
「鄭中基點會係韓星啊大佬？！」
「佢好韓嫁，唱歌又韓，拍戲又韓。」
「你係咪想講佢係紅星…？」
「係囉，我頭先咪話紅星囉，我連講嘢口音都學佢講唔正，幾搞笑啊～」
「……」
最後，我就帶住呢個鄭中基頭離開髮型屋。
明明話OK明白無問題…
明明話人與人之間，唔應該靠科技去溝通，面對面交談先可以消除隔膜，化解誤會…
咁點解宋仲基會變成鄭中基？
如果今次係用Whatsapp send相去溝通，就唔會搞成咁。
唔係話鄭中基個頭唔好睇，但要夾人囉。
理想同現實之間，總會有一大段距離。
我只係估唔到，今個個Gap會咁大。
我而家只係希望，頭髮可以快啲長返…