地產霸權，在香港都唔係咩新鮮野，基本上你買包紙巾都經誠哥個碼頭，都慣架喇～
之但係屈錢既野，梗係唔需要底線啦是咪先？
我呢幾日就見識過朗豪坊管理公司既新猷喇，唔洗羨慕我的，大家睇完下文都可以去感受下：D
話說朗豪坊12樓，即係星爸爸個層再上兩次超長電梯，即係執左CD 舖個度，即係星期六日有人唱歌個層，咁唱歌前面有個CAFE 鋪位，近幾個月開始由18GRAMS 承租。咁我呢D 日日（嗯，隔日啦）就去朗豪坊OFFICE 七樓踩單車（機）既人，呢度都無邊間食肆我係無幫襯過，呢間野D 咖啡幾香，意粉又唔會好似出面個D 咁削，而且下午茶時段又無咩人，我呢D 滋陰怕熱既MK 仔就梗係食開就唔想轉，所以食到連店員都認得我有咩奇怪要求架喇～
丫，扯到咁遠，呢篇唔係食評，不過打呢D 係必須的，因為我絕唔係不滿間餐廳，我好滿意的，日日食我都好HAPPY 的，我仲會約人來食的。
（好食架，信我）
本來呢，一間商場有好食店坐鎮，理論上係求之不得架喔，你睇尖沙咀重慶大廈地牢個度，唔係有間綠色唔知咩門庭若市，齋賣埋曬貴夾唔靚既運動物品真係搵鬼去，連自由行都唔受昆，慘慘的。
朗豪坊個規劃向上發展，轉轉轉上去個幾層，一年都唔知走幾多間舖，12樓連間CD 鋪都做唔住，有好野食帶動下人流，係明智架啵，但係丫，朗豪坊竟然不斷以行動趕走18GRAMS 既客喔～！
點趕？原來用呢幾舊野喔～
影呢張相既時候，我係幫襯緊既，我就係以食緊既角度影上去呢個風口位。
技術上，大商場都係用中央冷氣，咁有D 位係出風位，氣流大D ，本來係理所當然的，氣流唔夠勁，就會成棟商場空氣唔流通。
問題來了。朗豪坊既管理人，鷹君市務管理（冠君）有限公司認為咁樣狂吹風俾呢個位既食客係咩玩法呢？
我都知，齋睇字係無說服力的，我特登拍左片，大家睇睇兩個位既風吹草動係點誇張法。
紙巾吹到停唔到
Posted by 容樂其 on Friday, May 6, 2016
草草都吹到謝喇
Posted by 容樂其 on Friday, May 6, 2016
我可以同大家講，咁既環境之下食野，係溝唔到女的，條女一坐低一定問你：「做乜揀間野咁大風，你有無理過我感受，你根本唔愛我，我地活係兩個世界，我唔係唔肯同你挨，但係你只想到你自己呀！」
打緊呢篇文既時候，隔離檯個外母，一見到個女婿，就話「喂呢度好大風喔～吹到我個頭咁樣樣喔～調位啦～」，咁點撚得呢？影響夫妻和睦架！
我梗係有反映過俾侍應啦，但個妹妹一講到「我地都同商場個邊講過……」，屌，我唔想再追住佢喇，我而家直接同你鷹君講！
（喂我真係投訴架，唔係吹水的！）
我投訴唔係因為我憎死你地，而係我日日係度生活，我好鍾意食18GRAMS，我邊食邊做野好過癮，我唔想呢間野D 客食一陣就話大風就話要走，我唔想佢地吹到病然後懷恨在心唔返轉頭搞到呢間野執粒。
唔該你地儘快加個風閘乜乜乜，將D 強勁氣流吹向上，唔好吹著D 客，明明呢度吹向上就係無人的！
PS：呢篇野係我食完個五分鐘就吹凍既意粉，飲完杯唔洗加冰都做到既凍啡，再吹足九個字之下打出來的。
PS2：希望我唔會病。