其實由ViuTV嘅主打《跟著矛盾去旅行》，我哋就應該知道呢個電視台係鐘意搞埋啲矛盾事。《G-1格鬥會》播出咁耐以嚟，見就見唔少人叫「劇」入面某幾位女仔唔好再講是非…Sorry，我叫佢做「劇」係因為我認為導演絕對係有Plan去拍到今時今日咁嘅局面，仲要嗰班女仔係始料不及嘅。講返是非嗰度先，我記得有啲人係話『咩觀眾就有咩節目啫，』首先，我唔會同你拗到底係有觀眾先定有節目先，因為呢個真人Show係響上年十二月已經拍完，點呈現個中心思想好明顯係導演嘅決定。再者，我身邊好多人都比《G-1格鬥會》呢個名呃咗開電視。佢哋期待血腥，因為佢哋一向睇開嘅MMA係所謂無限制嘅博擊運動。
其實MMA都有好多規則，並非真正無限制。呢類格鬥運動最初叫做〝Vale Tudo〞，響巴西葡萄牙話入面意思係無限制。後來會改名做MMA（Mixed Martial Arts），係因為想避免太多暴力同血腥嘅形象。一般嘅規則係唔准插眼﹑唔准打後腦﹑唔准打脊骨﹑唔准咬人﹑唔准使用小關節關節技（手指、腳趾）﹑唔准打喉嚨仲有唔准踢下陰等，同時以體重劃分級別。《G-1格鬥會》亦都有講明係唔准用頭撞、唔准打後脊柱或者後腦、拉頭髮、同埋踢 _ 。呢啲規則其實普通MMA都有。但係大家應該留意唔到，佢係連肘同膝都係唔准用。亦都應該有好多人都留意唔到，呢係『首個女子MMA格鬥比賽真人Show』，佢將唔同體重嘅人放埋一齊打，就已經違反咗公平格鬥嘅原則，係切切實實嘅一個真人Show。
咩嘢係『真人Show』？根據維基百科，真人Show係『是一種強調實時現場直播，沒有劇本，不是角色扮演，聲稱是百分百反映真實的電視節目…它與電視紀錄片的不同在於，真人騷往往將關注重點放在戲劇衝突及個人矛盾上，其娛樂價值遠遠大於教育意義。』係喇，我哋又走返去矛盾，「聲稱」係百分百反映真實嘅電視節目。眼見好多人話『你打就打唔好搞咁多是非，』老實講，我又冇見過啲美國人睇《America’s Next Top Model》嗰時話，『你影就影（廣告相）唔好搞咁多是非。』到底咩係搞是非？如果你朋友比人打到豬頭咁，對方仲要耀武揚威話自己留咗力，先莫論孰是孰非，你會唔會破口大罵？如果你有機會、有能力，你會唔會十倍奉還？我冇能力都會練到自己有！同埋老實講句，某選手唔打爆另一位塊面，我覺得佢絕對贏唔到。唔係話佢打爆人哋有錯，因為我都相信佢呢啲三腳貓根本唔會識得控制力量。乞人憎就乞人憎在，佢險勝都仲要牙斬斬話自己留咗力啫，明明睇住佢中拳都仲要擰歪面，拳手大忌。同埋，到底係邊個「搞」是非，我係非常有保留。點解ViuTV要響節目中途，搞個『我最喜愛拳手』同『我最討厭拳手』呢？最戇鳩係，佢嘅所謂不記名得投票得八個人，唔使佢公佈都估到啦。何況，後尾逐個訪問晒，呢啲唔係分化係咩呀？
放大矛盾，將是非變成重點，不如唔好叫ViuTV，叫RIFTV，我睇得仲順氣啲。