我有個朋友叫阿輝，前排佢同女朋友結咗婚，仲買埋樓，前途一片光明。佢女朋友係基督徒，唔可以有婚前性行為。我朋友無怨言，因為佢真係愛佢女朋友，於是佢就發奮圖強瘋狂搵錢同女朋友結婚。
今日放工去食譚仔，叫咗兩碗米線，阿輝就開始同我訴苦。
「我真係唔明你，你自己又唔係信徒，做乜識個基督徒呢？」我問。
「我諗住基督徒又pure又true嘛。」
「你之前都話有信心調教佢嫁…」
「我真係調佢老味啊，我老婆同我講，神就係佢阿爸，我唔鍾意佢老豆，點同佢有將來喎！我心諗都痴線，咁佢當自己親生老豆係咩啊？」
「你拍拖咁耐真係一次都未搞過啊？」我問。
「搞？！我連暗示都唔敢啊！」
「點解？唔試過點知唔得呢？」
「每次我有少少暗示，老婆就晨咁早起身要我陪佢行山，有次我話想唱Ｋ，佢帶我返教會唱埋啲唔啱音嘅聖詩啊！」
「你而家都結咗婚又買咗樓啦，咪日啪夜啪囉。」
「我初初都以為係啊！但我為咗供樓，日一份晚一份，夜晚返到屋企，一諗起第日晨咁早起身返工，臨訓我老婆仲要祈禱話同阿爸父傾陣計先訓，我就無晒性趣…」
呢個時候，譚仔阿姐行過黎，問我哋係咪想加嘢食。阿輝佢睇黎真係谷精上腦，愈講愈激動，佢對住譚仔阿姐講：
「我想扑嘢啊！」
「痴線！扑嘢過譚仔三哥啦！」阿姐邊鬧邊彈開。
「冷靜啲，你試吓同阿爸父傾吓，心情會唔會平伏少少…」
「我平佢老母啊！喂我想扑嘢啫，我唔係無努力過喎，我為咗扑嘢而買層樓啊！」
我都唔知點樣安慰我朋友。於是，我哋就一直保持沉默咁去食完眼前碗米線。
唔知碗米線係咪辣得濟？我見到阿輝喺度喊…
我望住滴眼淚滴落混濁嘅麻辣湯底度。
呢一刻，我望唔透，我望唔清究竟呢個世界仲有幾多野我係掌握到。
當你以為搵個基督徒女朋友係未開發嘅清泉，但原來都唔輪到你開發。
當你以為結咗婚買咗樓，就可以改變生活，但原來…你忙到根本無時間扑嘢。
話時話，究竟點解譚仔阿姐聽見扑野，就叫我哋去譚仔三哥呢？！