（photo via cc Flickr user James Thompson）
「下星期個campaign我想加多塊backdrop呀！」麻煩客Amanda說。
「無問題，我即刻改返個報價畀你！」Brenda說。
「唔係呀，我意思係包埋喺原本個報價度，你唔係小小嘢都同我計掛？」Amanda說，好明顯，呢個女人嘅麻煩之處就係成日要喺唔加錢嘅情況下要你幫佢做多N樣嘢。
「哎呀，我好難同老闆交代㗎！」Brenda說。
「我哋今次無budget呀，By the way，你同啲記者咁熟，幫我call埋media啦！打幾個電話啫，唔好又同我講budget唔包PR呀，係咁啦一陣好畀個backdrop layout我睇喇，urgent㗎！ByeBye！」Amanda說。
以上嘅對話相信大家都會喺工作上聽過，老老實實，啲客有邊次係會有budget？我無聽過，我真係無聽過！有時佢地仲會「藝術家」上身，覺得個標題移上2mm會好睇啲、個綠色深1%會sharp啲，講真我唔信佢睇得出個分別，最慘嘅係佢地有埋「藝術家」脾氣，有次個主題係花，designer試咗好多唔同嘅花都唔啱個客心水，然後個客就好惡咁話：「啲花好樣衰！再係咁你同我食晒啲花佢！」果陣我啱啱出嚟做嘢無耐，覺得好委屈，差啲忍唔住喊，我果陣諗，啲花又唔係我搵嘅關我叉事咩，而且靚唔靚呢樣嘢真係好睇個人喜好，就算真係唔靚咪再改囉，我print啲花出嚟食落肚有_幫助咩？如果你奴性到答我食紙花都係人工包埋，fine，我無嘢好講。當然而家睇返就梗係覺得好小事，是但答佢一句：「我驚食咗啲花花落肚會肚痛，然後無人follow up你呢個大project呀，咁咪好慘慘豬囉。」咪算數，根本唔需要放喺心。
無論係大project定細project，啲客都會覺得係超級無敵大project，然後有十萬個要求，仲要好天馬行空，分分鐘難過上太空，而marketing嘅責任就係令designer喺期限內完成呢啲不可能嘅任務。有時做到迷迷惘惘真係會有錯覺以為自己跟緊個過百萬嘅大project，然後突然清醒返就會發覺只係跟緊塊幾千蚊嘅燈箱膠片，幾千蚊玩你成個月，完全係有可能發生嘅事，因為有啲客根本唔知自己想要咩，乜都叫你試咗先砌咗先，要你同designer不斷trial and error，因為佢覺得畀咗錢就係大晒，叫你做乜你都要做，爭在未叫你扮狗吠。有畀錢都還好，條氣順啲，當睇錢做人，最慘係錢都唔畀但多多要求嗰啲。喂！你唔好唔記得張poster係送㗎咋，仲多多意見！當然呢句我永遠都係收埋喺心度。
講真其實Marketing真係唔好做，特別係做agency，一嚟要受個客氣，二嚟又要受designer啲藝術家脾氣，個客永遠想改到最完美，而designer又永遠會覺得初稿就係最完美，根本唔使再改，簡直係矛盾大對決，再加上老闆同時又會卒數，簡直係三面不是人。好彩皇天不負有心人，小妹已由agency轉到in-house，即係變咗做客，由於老闆落order要我壓低agency個價，我就無奈地由Brenda變做Amanda，例排一開始要減20-30%，之後再叫佢地額外做多N樣嘢。最初我都覺得好難做，因為叫人做嘢就應該要畀錢，後來我先發覺呢個想法實在太天真喇，因為agency係會因應個客嘅麻煩程度去報大數，其實一早已經預計埋額外做多N樣嘢嘅錢落去，唔怪得我次次壓價佢地都好順攤，原來價錢同deadline一樣，永遠都係假。