（photo via cc Flickr user Edward Dalmulder）
香港近年社會上嘅不滿同不安係源自一種世代間嘅分歧。一種由擁有權力與財富嘅階層與相對缺乏社會資嘅階層所組成嘅社會形式產生嘅分歧。
過去幾十年，香港地產同金融業突飛猛進嘅發展令一部份人身家暴發。同時間，土地供求長期失衡嘅情況令樓價、租金飆升。住屋成本上昇，直接令其他物價上揚，對普羅大眾帶來經濟壓力。上世紀七十年代開始的一種意識形態「獅子山下精神」，其出現雖一方面鼓勵香港人勤力拼搏，另一方面卻令勞動階層產生一種循規蹈矩嘅服從性。一種奴性。
所謂奴性，於香港社會嚟講，係指一種低收入人士社群忠於以投機性質活動作為財富增值為捷徑嘅一種思想。以自身利益為前題下，於既定社會狀態容許下以投機性質商業活動取得有可能嘅極大收益為目標。一切有機會對這種維持香港社會投機環境有所改變嘅行為和思想皆被排斥。所謂服從性源於此，亦漸成主流思想。不想改變已成習慣，不計改變亦成規條。
由上世紀至今，牢牢守住這種思想同制度嘅人世代傳承落去。事實上貧富懸殊情況日益嚴重。喺環球經濟出現結構性轉變下，以依賴上述經濟活動為主嘅香港社會，即時呈現社會極化嘅思想分歧。對社會體制改革懷有希望嘅一代，以及希望以自身能力和學識賺取財富嘅一代會以實際行動改變實質和意識形態上嘅限制和困局。於是乎，出現近年雨傘革命，以及對本土意識嘅重視。
本土意識可以解釋為上述對制度作出改革嘅思想漸變成對極權嘅反抗嘅一種思想。面對大陸喺文化、政治、同經濟上嘅壓迫，本土意識成為年輕一代嘅中心價值。所以，本土意識嘅存在係源於香港近代嘅世代相爭。而以本土意識為政治改革、經濟架構轉型而推動經濟發展為中心思想有其實質價值。進一步喺要以政治權力去推動這種思想。九月立法局選舉係實際行動嘅第一步。
這是世代之爭。需要的，是一種徹底的改變。