有人道文革死人甚眾，其實亦唔係殺足十年。文革死人，主要應該係集中喺初期「武鬥」時期，中共禁止解放軍開槍，同時煽動學生搗亂，漸漸發展到解放軍裝備被搶用於派系械鬥，甚至出現拎個手榴彈去搶架坦克車嘅地步。終於中共中央下令解放軍開槍彈壓，之後就有所謂「先利用你鬥人，鬥完人就殺你」呢個假象：因為無論邊派佔上風都會最後畀解放軍鎮壓。
不過文革可怕之處，唔係早期武鬥、抄家、鬥學者，而係之後長達十年嘅「泛政治化時期」，將道德標準無限提高（不過個標準唔係我哋正常人嘅標準），告密盛行，完全切斷所有人同人之間嘅信任，連帶人際關係都斷埋，呢個過程入面，又有好多人精神上支持唔住，自殺棄世。無論如何，呢個過程尤其針對家庭倫理關係，令中國傳統嘅宗族社會完全瓦解。
然後再造就出一代完全自私嘅人種出嚟。
文革殺人，其實唔係其最大禍害，文革真正嘅禍害係「殺中國」。中國多次被外族統治，都可以恢復，係因為任何外族都冇法破壞中國嘅傳統社會，結果不得不依從中國傳統去統治中國，最後連統治者都失去咗自己。
文革期間，傳統社會瓦解，至文革結束之後，醒目嘅人即刻去讀返書考大學，但又有人以為會有下一次文革，所以就唔讀書，結果，八十年代佢哋分別向上爬同向下墜。佢哋經歷過八十年代嘅自由化時期，當時本嚟中國社會都仲有些少「希望」慢慢恢復，但偏偏又遇著六四，中國社會全面「向錢看」。六四之後都冇死嘅人，亦因為政風而進一步強化「自私者全」呢種心態。由於呢批人在上嘅已經係社會中堅、在下嘅亦生養眾多，佢哋治事教子，均係「道德免談」；因為宗族社會已消失，宗族冇法再傳承家教門風，家族前輩亦冇辦法影響呢群自私一代，核心家庭成為主流，教育亦必須由黨代理：新一代自細亦學識點樣虛以委蛇以得活命。
故此，中國嘅人文精神，經歷文革、六四，係興復無期，連帶中國亦都近乎消亡。
所以，明明大元、大清治下，中國都仲會產生一定嘅文化復興，但點解去到中共治下係完全冇文化復興嘅跡象出現？因為大元、大清殺唔到中國，而中共已經幾乎將中國殺死，之後佢唔需要再跟「中國」呢套法則行事，傳統文化亦失去最後嘅載體，新一代就算有心，都無從學起，更何談求索，亦難以重建出一套體統，所有「文化」，即使表面係傳統包裝，內裡都係蘇聯式品味。
另一方面，因為文革而形成嘅自私世代又會係邊個？要小心嘅係咩人？係1946年至1953年出世嘅人，因為佢哋就係文革開始之際讀緊中學嘅人，亦即係最中二病同最精力旺盛嘅紅衛兵。佢哋迷信私利、完全唔會相信任何人、見風使舵；因為唔信人，自然亦都剛愎自用，加上缺乏倫理觀同教養，待人無禮、小器亦不在話下。呢批人留喺中國教出嚟嘅仔女，亦即係今日我哋見到，中國30歲至40歲左右嘅一代人。（頭盔：大體上係咁啦，走出「國門」又肯歸化香港嘅，自然氣質都唔同！）
點解我知？因為我老豆都係紅衛兵囉～至於前面講武鬥嘅情況係廣東嘅情況，其他省份就冇第一手消息喇。
順帶一提，習近平，生於1953年6月15日。