我又何嘗唔係一隻只想做一隻港豬嘅港豬。
每日返工放工𢭃𢭃人工，得閒飲飲食食攞大假去旅行，睇下電視睇下戲。飲鉛水唔會死，最多甩多啲頭髮，反正老婆唔介意，呀女好鍾意。東江水眼不見為乾淨，電話騙案呃唔到我。走私客騷擾唔到我，旺角老銅老尖我又唔會去，理得你滿街只有金鋪藥材鋪。
不過，每日睇到大陸嘅偷呃拐騙、姦淫擄掠、殺人放火，無止境嘅污染、爆炸、死亡、不公，但我知道唔可以坐以待斃！雖然政治嘅野，一日都嫌多，打份工已經好辛苦，要我返到屋企仲要諗乜野係政治係更辛苦；但係我知道，政治係正事，以正確嘅方式去治國去安民。
而家，香港發生嘅荒謬事情跟大陸發生嘅已經無乜分別。李波事件、黑警老屈、黑錢貪污，仲有好多光怪陸離嘅事。沈默唔出聲只會累己累人。
作為一個父親、一個丈夫更加唔可以怕，要話畀身邊嘅人知呢個政府有幾咁錯、沈默嘅大多數有幾咁助紂為虐。唔好怕，就算係普通市民，大家都要多講多討論呢個政府所做嘅對與錯。不久將來，以言入罪、白色恐怖、不誠實使用電腦、網絡23條等手段就會成為政府對付市民嘅工具。
你睇，一個張德江訪港已經幾咁勞民傷財。佢仲要涉及隱瞞當年沙士疫情。你地可以睇到中共政府有幾咁殘忍自私無情。怕，唔止輸一世，仲會輸埋下一代，同將來！