（photo via cc Flickr user Simone Timi）
以下全為個人經歷及集合同學（不成才）經歷後得出嘅結論，偏頗到喊，仔女係真音樂天才+鍾意鋼琴嘅可以唔睇。
1) 冇興趣就係冇興趣，唔係你迫出嚟迫到嘅。
太多家長抱住呢個「興趣係培養出嚟嘅」嘅幻想，摧毀咗好多人嘅童年。係咪個個日日坐喺部琴面前一粒鐘，望住五線譜，撳下鋼琴啲制就會鍾意彈琴？
2) 八級周街都係
可能有部鋼琴唔知做乜跌咗落樓都砸死咗三個鋼琴八級。因為幾乎每一個被逼學琴嘅人都係以八級為目標，完成咗八級就完成咗佢對父母迫佢學琴嘅任務。（當然有更多未完成八級就頂唔順、父母都要被逼放手嘅人）學完八級會再掂部琴嘅機會係極細，所以考完八級即係代表屋企部琴可以賣出去了……
3) 預咗燒錢
學琴真係一樣好燒錢嘅課外活動嚟。每個禮拜九個字，覆一次歌，咁就二百幾三百。實質學到啲咩又唔係好知，老師話彈得未夠好咪未夠好咪下堂繼續覆囉。學八九十年就十萬架喇……其實如果小朋友唔鍾意嘅話，不如將呢筆錢擺喺啲更有意義嘅地方好過。
4) 學琴唔代表會教琴
承上項，雖然個個被逼學琴嘅都知教琴真係搵到好多，但係由於唔想再荼毒人哋啲仔女，又或者唔想再掂部琴，所以搵part time 好多都會寧願補習搵少啲，都唔想教琴。以為仔女會因為你迫佢學琴而教琴搵錢嘅，太天真啦你。
5) 唔係個個都係天才
唔好見到仔女細細個就識跟住音樂跳舞或者喺琴行可以篤返啲兒歌嘅音出嚟就以為佢睇好有音樂天份。到你迫咗佢學琴之後你就會發現同當初諗嘅嘢好唔同。
6) 學琴唔代表贏在起跑線
如 2) 八級真係周街都係，好多人都有學琴，不如搵一樣又特別仔女又有興趣嘅樂器？同埋八級都幾難考，分分鐘要考四、五次先考到。嗰啲預備考咁嘅時間原本可能可以用喺溫書或者學下其他嘢嘅……原意可能係想仔女贏喺起跑線，但係學琴可能反而害咗佢……
7) 鍾意音樂唔代表鍾意鋼琴
鋼琴相比起其他樂器真係悶好多，手指唔靈活嘅就更加係惡夢。（呢啲真係100%個人經歷：我鍾意聽歌打鼓，但係真係好唔鍾意彈琴，好悶好悶，每次彈琴都係一模一樣，冇進步、冇啲可以玩嘅地方，完全係折磨緊我。）
8) 不如一啲鋼琴叻少少嘅同學係會自卑嘅
小學嗰陣已經有同學唔知點解可以考到六七八級。學校音樂堂考試考樂器就會變咗佢哋嘅showcase，搞到我呢啲有學琴但係好渣嘅就唔敢獻醜而默默吹牧童笛算數。:(
9) 唔好以買咗部鋼琴返嚟作為迫仔女學琴嘅籌碼
當明明唔知仔女係咪有興趣學落去都去買部琴返屋企，真係有嘅話就係啫，冇嘅話真係又貴又阻埞。仔女又會覺得既然阿爸阿媽都買咗部琴返嚟，無理由嘥咗部琴，死死氣捱都捱埋佢。辛苦自己又辛苦個仔/女，何必呢。未肯定有興趣學落去而要練琴嘅話不如去社區中心book琴房練琴？
10) 仔女唔係你實現目標嘅工具
如果你迫仔女學琴係為咗彌補你當年 冇錢學琴/阿媽唔俾學琴 嘅遺憾嘅話，我想你知道，仔女唔係你實現你個人目標嘅工具。己所之欲，勿施於人。仲有，佢哋唔係你曬命嘅工具，如果你係為咗有個鋼琴八級嘅仔女用嚟同姨媽姑姐曬命嘅話，我希望你收手啦。佢哋唔係你嘅複製品，雖然你生佢出嚟，但係佢唔係屬於你嘅工具。
實在眼見太多家長迫仔女做啲佢哋唔鐘意做嘅嘢，摧毀咗佢哋嘅童年。若然你係諗清楚就算仔女唔鍾意都係要迫佢學琴嘅，我會為個細路嘅童年默哀三秒鐘。