以前讀中學個陣覺得補習真係份幾荀嘅工，坐係到兩粒鐘教下啲本身就識嘅野就有錢收。之後上到大學都會接幾份補習做下賺下生活洗費，基本上都無再問父母攞錢用，有時諗起咁樣算係有啲能力養自己都咪話唔有啲沾沾。
之但係咁，補習呢啲真係好講彩數。開心嘅咪遇著個上進學生同你一齊奮鬥入U囉，唔好彩嘅就真係喊十聲都無用。曾經補過一個中二學生，連啲垃圾功課都要我坐係到睇住佢做。咁唯有叫佢用平時啲時間溫書啦，結果直情係聽日考試但就連考邊科都唔知。 又補過個港孩小學生（其實小一都要補習係想點），基本上上到去都係睇佢扭下計發下脾氣咁，兩粒鐘先做得一兩份功課。利申我唔熱心教學，亦都無話要作育英才，但我收左你錢呆坐兩粒鐘又教唔到野，其實都會覺得唔好意思嘅。所以經常撘𨋢落樓個刻都問自己，到底自己係到做緊咩呢？我收左人錢，咁有無幫到人啲咩呢？
出𨋢之後電話一收返訊號通常都會打俾呀爸呀媽講聲補完習而家返屋企喇，正常都會順便呻幾句話「唉今日個學生又講極唔聽」、「唉個𡃁仔又死都唔肯做份功課」。其實都係講下，我都唔期望我老豆老母會傳授啲調教仔女嘅心得俾我。但佢地嘅反應真係衰過唔應──
「打份工姐，咁認真做乜，又唔係叫你真係做老師」、「最好佢扭計扭足兩個鐘呀，幾好搵呀」、「你咪鬼成日鬧佢添呀，無一個家長鐘意俾街外人鬧自己個仔架」。無錯，係呢兩條友眼中，補習就係託兒啲friend；唔好講咩學唔學到野，總之你氹得掂個細路就有工開啦。同佢地拗落去，再難聽啲嘅說話都有：「你唔做大把人爭住做呀，好過我坐成日係office呀大佬」或者「你估人地家長真係叫你教仔咩，人地搵個大學生返黎做下書童渣」。雖然，有好多家長都真係痴痴地線，當正啲補習老師係萬用人（呢樣野夠寫另一篇文）；但點解我只係想認真啲做好我份工，反而好似係我問題咁嘅？諗返起以前幫我私補個位姐姐都覺得唔係幾好意思，搞咁多野最後係我老豆老母眼中都只係個頹做就有百幾二百蚊嘅小丑。
其實講緊嘅唔止係補習，而係任何關於返工搵錢嘅野都唔好同佢地呻，因為只會有兩條路。一，你份工好搵過佢地嘅話（指嘅係付出同收入嘅比例，唔一定要係高啲人工）：荀工仲係到嘈，有無病呀？我地日做夜做，你咁多聲氣唔好做囉大把人爭住做@#&%。二，你份工無佢地咁好搵嘅話：捱下都要嘈，咁易搵我地就唔洗咁辛苦啦想當年我地%&#@。
總結：唔好生仔，咁就唔會令你啲仔女難做或者難受。