高登巴打Google Map自己寫code起網搞咗個網上緣份配對計劃（Matchup），為一眾「哪有女」、「哪有仔」嘅巴絲帶來希望，計劃開始咗十幾round，依然聽到玩Matchup嘅朋友呻冇人揀自己，或者揀完對方冇心傾落去，然後灰住機又帶點希望join下round，又呻，循環……於是我搵幾round識落嚟嘅巴打幫手，再用幾round做咗一個月不科學嘅實驗，驗證咗做票王票后嘅方法。
一round Matchup嘅流程係，填好份個人介紹（稱為CV），跟住報名 — 呢度又係一個關鍵 — 對男參加者來講，計劃規定男女比例最多2.5:1，即係每多一個女仔就有多兩個名額畀男仔，但男女報名人數永遠失衡，男參加者往往F5到爛，通常報名結束時有三百幾個女仔，但有接近一千個男仔，然後到揀人階段時又有百幾個女仔因為冇揀人而被取消資格，相反男仔被取消資格得幾十個，所以最後係九百幾個男仔配二百幾個女仔。
跟住就係揀人階段，各參加者可以由長長嘅CV列表入面，揀選想識嘅人嘅編號，男參加者可以揀四個，女參加者可以揀六個，到開彩時就會見到有幾多人揀自己（即幾多票），同埋投票畀自己嘅人嘅CV，就可以揀其中一個去chatroom傾計，而你上階段揀過嘅人當中都可能有人會揀返你入chatroom傾，所以男仔最多可以識五個人，女仔最多可以識七個。所以最後有冇人同你傾偈，最大因素係取決於你份CV。
問題就來啦，到底份CV點填先會受歡迎？因為男女比例失衡，男仔有四五票已經好好，好多時得一票，或者同你自己一樣，都係零，票王通常十五至二十票，但女仔平均都有十票，票后通常八十幾九十幾票，有時仲會過百票。
我開頭用自己真性情寫CV，都有十幾票，排頭四五十名，識落唔少巴打，於是搵佢哋幫手做呢個實驗，收集意見、度CV，同埋最緊要，當然係借ac啦（要ISP email或者最少80個friends嘅Facebook ac先可以報喎）。實驗方法就係分別放三份男女CV，內容各有少少分別，睇下邊個因素（身高、外表、職業興趣、性格等）最影響票數。
其中一位巴打，我喺呢篇文稱佢為矮先生。其實矮先生話矮，都高過利威爾兵長，有愛德華計埋對鞋同頭頂條呆毛嘅身高，但喺Matchup女參加者會用filter篩選高人嘅世界入面，就係your height your fate。有畀意見嘅巴打話，如果你身高168、169，寫高少少做170，嗰肉眼睇唔出嘅一兩cm，會令你喺Matchup有完全唔同嘅結果。
矮先生成日呻次次一開始已經畀女用filter剔走，我都同佢講身高同溝唔溝到女冇必然關係，我有男仔朋友160都冇，依然食女無數，而且係罐頭刀，其實現實中矮先生有心溝女嘅日子裡面，都keep住有拖拍。
另一位巴打肥毒柒先生，佢真人真係肥毒柒，但每round都有票，講過男參加者關鍵係高同埋歲數夠（廿尾但未夠三十），外表描述隱惡揚善，性格唔需要寫到自己好好，「專一、細心、孝順、照顧人、幽默、樂觀、上進、浪漫，你信唔信呀，唔on9都唔會寫自己專一，呢啲垃圾嚟。」但好多男參加者會寫呢啲垃圾，而且寫到作文咁長，雖然計劃早期普遍都寫得簡短時，長CV會較顯眼，但宜家個個有樣學樣，只會too long didn’t read，而且畀人覺得你現實都會好煩好長氣。
我同矮先生同其他巴打歸納出成為票王嘅條件，度咗份「男神CV」︰178cm高，27歲，專業人士，陽光運動型，養貓，興趣有各種運動、攝影、煮飯沖咖啡、旅行，性格係認真又得玩又得，會講笑唔會悶親人（即係冇性格囉屌），期望對象係冇乜要求合眼緣就得。然後揀人階段時random揀四個。
派彩日矮先生打開結果，得到佢前所未有嘅九票，排名十四。
當然揀佢嘅女仔理由都係寫「我都鍾意貓」、「我都鍾意影相煮飯」、「我覺得我同你至少做到long lasting ge朋友」，但矮先生揀嘅四個，一個都冇hi返佢，於是佢喺九票入面揀咗「我覺得我同你至少做到long lasting ge朋友」嘅絲打。
矮先生︰Hi XXXX 多謝你揀我哈哈
絲打︰Haha hi Thanks for choosing me back lol
矮先生︰好奇一問，點解你會覺得我地keep到friend呢
絲打︰無㗎喎 感覺囉~ 我睇CV唔係真係睇內容，係睇果個人打字啲語氣，我覺得你似我打啲語氣。Honestly to say I just picked one and that’s u lol I’m lazy to read all every time just choose one
其實睇返個絲打份CV，係一撚啲都唔似。
絲打開始問矮先生攞LINE，矮先生話畀佢問多條問題先，問如果佢冇178會點，絲打答︰「咁好老實我CV講明要168up，就算真係無咪吹下水，同埋我唔expect你靚仔高大，真係靚洗鬼玩。」
於是矮先生講返佢真實身高，留低LINE，話如果佢想吹水就add佢。
第二日，絲打LINE真係add咗矮先生，係add來屌尻佢。
至於點屌法、屌成點，矮先生冇話我知。
下一round，將份男神CV改少少，興趣同性格內容差唔多，但再豐富同詳細少少，最大唔同係身高得返167，職業寫基層小薯仔搵兩餐。
結果得返一票。
第一階段嗰四個女仔完全冇hi過，而唯一一票嗰位女仔，問佢點解咁矮都揀，佢只話「身高呢家嘢……」就冇了。
本來諗住做到呢度完，但我咁啱識到位前票王，佢係票王時有接近二十票，外表描述係衣著打扮、咩style，性格寫潔癖乾淨、唔發脾氣、好聆聽者聽人講心事，但佢發覺多票都冇意思，將外表改做一堆冇意思、一睇就知係玩嘢嘅字，性格寫成「有心傾就會知」、「唔重視嘅打咩都冇用」，就跌到得返一兩票。點解多票都冇意思？佢話啲女可能大把選擇，唔會珍惜同人傾偈嘅機會，吊高來賣，你唔搵佢佢絕對唔會搵你，hea覆，跟住就唔再覆。
於是我再實驗多一round，用個分身男ac，各樣都參考返前票王唔再係票王時嘅寫法，性格寫︰「識落咪知囉，啲人打到專一又幽默又冇脾氣實際咪又唔係」，唯獨外表用返陽光運動型有肌肉嘅標準男神描述。
結果我得到十八票，排名第一，我做撚咗票王。
我個分身男ac做撚咗票王。
睇返啲女揀我嘅原因，除咗興趣相近、鍾意貓嗰啲，佢哋係欣賞性格描述好真性情。但係自己揀嘅四個女仔，一個都冇hi我，最搞笑係見到有一個係揀返我，但揀完都唔hi我，而十八票裡面我同其中一個傾咗兩句，問佢份CV邊個項目係假的話佢最難接受，佢冇再覆。
綜合以上實驗結果同眾巴打經驗，男神係︰
- 多才多藝，玩唔同運動又睇書睇戲影相，煮飯沖咖啡整甜品，外表陽光有肌肉會襯衫打扮，職業就算唔係專業人士高層人員，唔好寫得太寒酸，大約講邊行就得，例如就咁寫服務業，性格點都冇關係，語氣輕鬆真誠就得。
- 鍾意貓加分。
- 滿足以上咁多項，只要你身高冇170，bye 尻 bye。
- 但其實通通都唔重要，因為啲女都係冇心傾落去，搵話題永遠係你一個嘅責任，佢唔會主動搵你，你主動搵佢佢又未必理你，無論你二十票定一兩票，最後keep到傾落去都係得一兩個女仔，只要唔係零票就得。
跟住講女CV實驗。之前好多巴打都話，真係會睇外表，文字描述都睇到外表？佢哋話女參加者外表方面通常都冇作大，交換相之後，寫普通、中上嘅真係OK，寫唔靚嘅就真係唔OK。
我用自己ac同一位巴打嘅女分身ac，放咗兩份極相似嘅CV，都係做接觸小朋友嘅行業，興趣係畫畫、做手工，宅，好照顧人，好鍾意同人傾偈，成日覆人，傾唔停，本土派，不接受藍絲黑警，期望對象唔洗靚仔，對佢好就得。
最大唔同係，我自己ac嗰份外表係「親戚成日話我呀媽就好啦生到個女咁靚」，BMI 19，而巴打分身個體重略重少少，BMI 22，寫到明「同個靚字無緣，少肥」。
我份「靚女CV」得到五十三票，排名第二。而揀咗六個人入面，有五個都hi返我。
巴打分身份「唔靚女CV」，得七票，六個入面有一個hi返佢。
對「靚女CV」嘅「實驗品」，開始傾偈後我都盡量問清楚佢哋揀我嘅原因，當然佢哋都會答興趣相近、性格嗰啲，當中有兩個延續到呢個topic，進一步問佢哋點解冇揀到巴打分身嗰份「唔靚女CV」，明明興趣、性格都一樣，其中一個開始都係咁話語氣相差少少，之後都提到係揀外表，另一個好老實咁話，唔靚同少肥已經趕哂客。
我再放另一份CV，身高體重、外表描述同上一份「靚女CV」一樣，都係鍾意畫畫做手工，相反嘅係social好多，會飲酒、周圍玩，會屌人，獨立同要求個人空間。
結果都唔差，有二十七票，排名二十四。
而以上接觸到嘅「實驗品」裡面，有八個成功問到佢哋，如果份CV係假，最難接受邊樣同現實不符，有五個答最難接受係藍絲，有一個答對方要求靚仔，一個答肥，一個答矮。
綜合以上，女神係︰
- 最好係宅女乖乖女、健談、溫柔照顧人、痴身，其次係獨立、有思想、爽直，後者喺年長成熟嘅男士中較受歡迎。
- 鍾意貓加分。
- 只要話自己唔靚、肥，受歡迎程度大大降低，但唔至於冇人理。
- 本土派、建國派加分，至少要係黃絲，絕對唔可以係藍絲。
雖然都有毒撚呻冇女，但明明香港人口比例都係女多男少，又話男人返大陸娶老婆，好多剩女乜乜乜，咁點解Matchup女仔人數得男仔三分一，男仔報名爭崩頭，通常都珍惜揀到嘅女仔好有心機傾落去，但女仔都唔愁識唔到仔咁對佢哋愛理不理？有巴打話女仔現實中大把途徑識人，唔需要Matchup，咁男仔女仔唔係生活喺同一個香港嘅咩？女仔現實嘅識仔途徑，咪又係男仔識到女嘅途徑囉。
點都係冇奶油㗎喎，根本就唔符合香港人口比例！所以呢次解答唔到條問題係，究竟啲女去哂邊？
喺度多謝咁多round識落嘅巴打提供意見同協助，同埋各位「實驗品」巴打嘅合作，好多都繼續傾到宜家，keep到做唔錯嘅網友。
如果有人不幸喺以上實驗中覺得被巴打呃咗，令你有希望之後失望，浪費咗個quota，請唔好怪巴打，係我指使佢哋嘅，要屌就屌我，係我仆街，係我玩串個party，對唔治。