唔知你哋有冇識過一種人，每次同你傾計，都係講緊前度。我講緊嘅，唔係同一個前度喎。
我就識得一個咁嘅人，成日搵我傾計。佢曾經同過一個女仔一齊，後來又同咗個男仔一齊。同男仔一齊嗰時，佢係咁話個男仔咸濕，又話雖然個男仔好錫佢，但硬係覺得自己做緊個男仔前度嘅影子。嗱，我可以話你哋知，好多情況底下，當一個人佢覺得另外一個人點諗嘅時候，好多時候，其實佢先係咁樣諗嗰一個人。好多人都做唔到設身處地，即係代入嗰個人去思想。佢會代入嗰個人，但係用返自己思想，響佢印象中嘅嗰個人，只不過係『佢覺得』出嚟嘅一個人。
然後，佢就不停盛讚個女仔有幾好、有幾細心、有幾唔咸濕…直到，佢換咗男朋友。第二位男朋友，除咗咸濕，當然都有其他缺點。呢個時候，我就開始係咁聽佢講，前男友對佢有幾好、有幾細心、有幾靚仔、有幾唔計較。丫屌你，點解你以前唔發現㗎呢？所以真係難怪啲慘情歌成日唱『落錯車，如離開了幸福的高速路，誰又保證我明天 _ 老母…』都一定Hit。
故事講到呢度點結尾？就係呢個女仔嘅男朋友Inbox 我，搵我傾計，佢話『不如你教吓我，點先可以令佢更加愛我？我成日都覺得佢掛住以前嗰個。』
「咁咋吓嘛？好簡單啫，同佢分手做佢前度，好快掛住你。」係咁㗎喇，忠言總係逆耳。