（photo via cc Flickr user Alan Antiporda）
相信身處香港嘅各位都有以下嘅經歷：
（一）：手機鈴聲響起
（二）：你拎起手機
（三）：「請問係咪X先生/小姐？」「我係。搵我咩事？」
（四）：「X先生/小姐你好！我地嚟乜乜公司打嚟嘅。請問X先生/小姐有冇興趣——」
（五）：「唔好撚再打嚟。」然後你cut線
話說小弟依家就喺外國讀緊大學，為咗幫補學費，早排係campus搵咗一份call centre嘅part-time（利申：純粹時薪，冇佣金），做咗兩個幾月，到final exam開始就冇做。呢份工係由大學入面負責聯絡校友嘅部門開設，工作其實就係搵校友捐錢。雖然做嘅時間唔長，但出奇地學到好多嘢。喺大家準備圍插小弟之前，容許我先講吓自己兩個月以嚟嘅經歷。
本身小弟係抱住滿腔熱誠去返工嘅，始終我哋攞到嘅donation係全數撥入bursaries，都算係做緊善事。有人工，又幫到人，仲可以練好啲英文，何樂而不為呢。
點知原來份工真實嘅工作同job ad所講嘅落差非常大。
首先，有時打差唔多幾十個電話先會有一兩個有人聽。粗略估計，喺小弟打過嘅過萬個電話裏面，有人聽嘅唔過四成。當然呢個唔係咩大問題，因為主管唔會因為呢樣嘢對我哋嘅工作表現俾負評。
另外，小弟原本以為，既然我哋係負責聯絡校友，理論上對方應該會對我哋呢班師弟師妹有些少禮貌；但係我完全低估咗人類對錢嘅重視程度。雖然我地聯絡嘅對象全部都係校友，但係一知道你打嚟係想佢捐錢，佢哋嘅態度大部分都會540°大轉變，甚至會鬧人。真係有耐性聽你講嘅，有時成個shift一個都冇。我仲記得，曾經有一日成個shift我冇一個電話能夠講超過30秒而對方唔cut線。
做過fundraising一類工作嘅人應該會明白，好多時候一個人肯唔肯捐錢，其實真係好睇個人意願；若然對方唔想捐，即使你有幾努力都未必影響到結果。當然啦，肯努力嘅話，有時或者會有些少機會嘅，但呢啲真係少數。講真，如果唔係主管喺度聽住，肯定好多時候扮signal差然後cut線。
不過，其實份工唔係只有缺點嘅。唔知主管係咪因為知道我哋班agent壓力大，所以喺office會播吓音樂，而且仲會派吓糖（食得嗰啲），所以整體嚟講個office都算營造到一個輕鬆嘅工作環境。而且間唔中都會有啲校友比較友善，仲會講吓自己當年嘅經歷，雖然呢啲只係極少數。
呢份工仲有一個優點。由於我可以睇到啲校友嘅個人資訊，我會知道佢哋究竟咩degree畢業，而透過同佢哋交流，大致上可以睇到經濟環境嘅強弱；例如依家世界上邊啲學系前景好，邊啲學系前景唔好咁樣。唔係講笑㗎，有次見到有個校友係biology major畢業，兩年後走咗去商學院讀咗個會計文憑（人生⋯⋯）。有啲嘢，不言而喻。哀栽也。某程度上，算係睇得出間大學邊啲資訊係靠吹出嚟，例如就業率。有時同呢班校友言談間所得到嘅資訊，比任何升學數據更加實在。真心我覺得我依家可以去做升學顧問。各位怪獸家長可以pm我，唔啱聽唔收費。
總括嚟講，呢份工雖然吃力不討好，但係絕對學到嘢。打過咁多個電話，英文的確係好咗，EQ亦大幅提升。而上司亦算好人，喺我離職之後都寫咗封幾靚嘅reference letter俾我。
順帶一提，其實大家有冇諗過，當有呢啲call centre agent打俾你嘅時候，點解即使你扯唒火鬧呢位agent叫佢唔好再打嚟，經常都會有同一間公司打幾次電話嚟呢？其實是咁的，如果你有見過一般call centre所用嘅電腦系統，你就會明白，要再次打俾你，其實好容易。例如只要set定時間，系統可以準時係三個星期後嘅星期四下午七點三十二分十五秒打俾你；call centre agent都係人，俾你鬧過都會有報復心理，咪打嚟煩吓你咁囉。再加上，有啲call centre嘅主管會好著重每個agent嘅success rate，尤其係做推銷嗰啲；故此有啲agent會寧願打多幾次同一個號碼嚟搏一搏，至少可以係數字上降低失敗率。
講真，有得揀嘅話邊個真係想做call centre先得㗎。小弟自問都係為錢去做㗎咋，唔通真係為理想咩。下次各位讀者遇到呢一類電話嘅時候，其實直接cut線咪得囉；你地唔cut線繼續講繼續鬧，咪只係浪費大家時間。Call centre agent都係人，講到尾，大家都係打份工啫。