六四晚會係得一個好定越多越好？應該係越多越好。
晚會唔一定係悼念，仲可以係戀愛嘅中途站。
六四，本身就係一場政治意向嘅表態大會，情侶間紛紛趁呢個時候認清伴侶嘅政治取態，避免自己遇人不淑──自己已經係年青有活力、連樹根都要跟風嘅本土派，男朋友仲支持嗰個搖擺不定、柒出國際嘅小政棍黃之鋒，感覺上硬係非常扭擰，拖泥帶水不如趁早解決。
「有冇發覺，自從上次補選我支持咗6號之後，我哋越嚟越唔夾？」喺公義小店女工門前，佢一邊等充滿公義味道嘅雞蛋仔，一邊講：「I mean，其實喺投星火定左膠莊嗰陣，我哋嘅世界已經越嚟越遠，我喺到諗，大家都到咗咁嘅年紀，係唔係應該冷靜咁find out，睇下點樣解決呢場crisis呢？」
呢句說話，觸動咗成面暗瘡，戴住銅絲眼鏡嘅佢嗰啲敏感嘅少年觸覺細胞，佢放低食到一半、唔個充滿人情味、價值十幾錢、仲貴過連鎖店、又唔太好食嘅格仔餅，用廉價嘅紙巾抹一抹嘴：「我知，你都係唔想喺嚟緊禮拜六陪我去維園啫！嫌我老套。你好嘢呀，嚟緊喺邵逸夫堂睇盧斯達！鄭立！我只係一個左膠，配你唔起。」
「Come on James! 可唔可以成熟啲呢？」佢講：唔通我喺你眼中就係一個咁唔理性、只關心政治嘅本土怪？其實我哋嘅differences，喺雨革中已經浮現。例如，我想去旺角，但係你堅持要去金鐘，我哋仲鬧咗一場交，嗰時我就諗，我哋會唔會係兩個層次嘅人嚟呢？」
少年好似意識到佢哋兩人嘅結局，帶點唔甘心咁講：「但係，嗰次係我想支持理性對話呀，⋯⋯唔通想理性啲係一種罪咩？如果係，點解你唔早啲講呀？」
「I’m not talking about rationality! 你好清楚。」佢將語氣提高咗半個語階，呢個時候佢覺得自己就好似辯論緊嘅梁天琦咁：「仲有，我接受唔到你嗰套香港唔可以獨立，因為共產黨唔會畀嘅言論，我覺得建設民主中國更加不切實際，我接受唔到你嗰套愛國主義嘅大中華思想！我對你講過好多次㗎，只你從來都冇用心聽⋯⋯」
「我屌！」少年終於忍唔住：「我知你睇我唔起！我哋分手啦！」佢擺低廿幾蚊喺櫃臺，畀曬合共一底雞蛋仔一底格仔餅嘅錢，發晦氣話：「我祝你嚟緊呢個禮拜六，喺邵逸夫堂聽得開心啲。」
佢離開咗女工門口，少女木然咁望住佢嘅背影，呢一刻，佢有種想食煙嘅衝動。手提電話響起，佢接聽：「喂，喂、係你呀，我同佢講清楚啦⋯⋯」
呢個係中大哲學系二年級嘅新男友，六月四號，總有好多犧牲，唔一定喺天安門⋯⋯