好多人睇完本宮篇處女文之後，俾既意見係老娘36C好肥。人地嬲死你地啊，你地物化女性，可恥！唔通本小姐有25吋小蠻腰又要同你地報告咩？另一個意見係：一睇就知係麻甩佬FF扮女人寫架啦。話小女子肥都唔緊要啊，但係話本宮係男人就勢係假啊！冤枉啊，大人，奴家願意承認年少時曾花數千元割包皮，啊唔係，係割雙眼皮，但本小姐一對傲人既雙峰，係貨真價實，童叟無欺，如假包換架！本宮在此呼籲所有同小女子有過一手既恩客係時候要報一炮之恩，凡係揸過，舔過既都要出黎為民女作證，討回公道！咩啊？無錯啊，本小姐上次係話自己係未破壁靈芝孢子，但少年你太年輕了，邊個話處女膜唔可以補番架姐？
上回講到揀客與彈鐘，但媽媽生話我寫到好似情挑恩客咁，影響到視光師專業形象喎，所以老娘今次決定要寫番d正正經經既驗眼小情趣，啊唔係，係小知識至真。
（photo via cc Flickr user Tony Webster）
本宮成日聽到有人講邊個視光師驗得準，邊個唔準，通常本小姐同班同業都會一笑置之。大家知唔知道，其實驗眼既方法主要有兩種，一種叫Subjective Refraction，另一種叫Objective Refraction，而一般九成九都會用Subjective既。
首先，等老娘講解下乜野叫做Objective Refraction先，話明係Objective，姐係客觀D架啦，咁就完全唔需要個客俾任何反應，答任何問題，完全係靠小女子上下左右自己郁，靠視光師既手勢同功夫去驗架，一般姐姐都會攞住碌又黑又粗既圓柱體道具去助慶架，而E碌野就叫做Retinoscope，其實外形同本小姐平時玩開個D趣味道具好相似，都一樣要入電，只係唔識震咁解姐。女視光師無左呢碌黑棒就驗唔到眼仔架啦，所以每個Part One視光師都會有一碌架！通常，Objective Refraction適用於幼齒，姐係未識講野既小朋友，又或者表達唔到，講唔到野既客人身上。咁呢 D case，大家就真係一買一賣，成個服務過程無乜交流，唔傾計，無初戀女朋友感覺架。因為我地專業性服務工作者需要高度集中，專注於搵個個敏感點出黎，再適當調節力度同方向。所以，Objective驗得準唔準就真係靠本小姐對巧手啦！
咁到底乜野係Subjective Refraction呢？姐是靠客人主觀講我地知邊個位中，邊到舒服D，我地就去配合客人個到去探索。所以，Subjective Refraction主要靠我地把口架。記唔記得本宮上次講過自己口技了得，包你五分鐘內就……啊，都係講番正題先，除左我地個厚唇同條脷要郁之外，客人都要出聲配合架，姐係當我地問1鏡清D定2鏡清D個陣，就真係有兩個唔同既度數俾個客選擇緊架，當客人答我地邊一個度數好D，我地就真係俾個個度數你架啦，咁當然我地仲有D技巧去驗證下既。我。D恩客呢，就通常都好清楚咁答到我1好D定2好D，但有少部份客人係會陰我地架……例如，佢地會答1清楚D，但係2更加清楚；又或者，1清楚但係D字濛D，2無咁清楚但係D字實D！呢D 時候，本小姐會反白眼反到去後腦囉。因為真係唔會減一百度同加一百度俾個客係無分別又或者咁難分架囉，明明無可能有咁既情況出現，但就硬係有D客咁玩人地……本宮聽到咁既反應個陣，一定會重復一次佢地講既野，好少少既會醒番，認真少少，但有D真係唔覺得有問題架……大佬啊，對住呢 D客，點樣驗得準喎 ：（ 奴家打份工架咋，唔好逼死小女子啦。
話時話，上次本小姐叫咁多位看倌俾D意見，調教下奴家，點知無人Show小女子。於是，小女子逼於無奈pm番容嬤嬤問下點樣可以改善下，寫得更好，奴家受容總禁室培慾調教後1，決定將E篇文變成半甜半技術，希望仲有Click啦。最後，期盼各位看倌再俾D意見奴家啦。好啦，本宮要繼續同班男寵鬼混啦，跪安啦！
- 編按：無禁室