依個世界有一種痴線佬，
或者文青少少會叫佢地做瘋子。
佢地嚮往自由同時憎恨不公。
傻到有時，
就算件事情唔係幾關佢事都好，
只要見到聽到唔公平既事，
都會奮不顧身。
真無一句「厭惡邪惡 那怕衝突」都未足以形容。
D人成日形容個社會係一個循環。
每個人對社會付出，
社會既主流就自然會回報。
簡單d黎講姐係話今日你係街到幫阿婆執橙；
聽日你仆街都會有人扶你一把。
以前迷信嘅人會話呢啲係報應定咩。
但其實道理好簡單，
你對人哋好人哋咪對你好囉；
個個都要對人哋咁好咁個個咪都對個個都咁好囉。
哇！咁咪巧開心，大團圓結局！
但呢種境界係相當之難達到架。
尤其是係咁功利嘅香港。
簡單嘅幫個阿婆執橙，
成日睇警訊精明嘅你會諗個婆係咪「跌_黨」要呃你錢；
而突然見到有咁好死幫佢執橙既阿婆會諗——你係咪想偷我d橙
哇，執個橙 ，
個種互相猜疑拉成既張力 ，
個種鬥智鬥力形成既暗湧。
係香港做個好人係好難架。
呢個唔係你嘅錯。
係社會嘅錯。
換言之，
係大家嘅錯。
但香港慶幸仲有個何韻詩。
我哋姑且唔好理佔中啱唔啱，
（宣布世界大戰已經結束）
何韻詩係一個關心香港呢個家嘅人，
依一點無人可以質疑。
而且佢對於社會既責任感，
比我地想像中更加強大。
其實好多道理香港人係明白。
你估咁精明香港人唔知飲緊咁污穢既東江水係好撚貴既咩；
你估咁安穩既香港人唔知無啦啦俾人捉返大陸係好恐怖架咩；
你估咁權貴既香港人唔知自己無權選特首係唔公平嘅咩。
多一事不如少一事啦。
明白既，
你有包袱，
佢有包袱，
大家都有包袱。
但大家剩係顧自己，個社會點算？
一個本來知名既歌手，
一位唔憂柴唔憂米既公眾人物，
佢既包袱比好多人都大。
其實有時會奇怪咁樣諗，
點樣依個世界有d何韻詩咁既傻豬。
好多香港人走上街，
係因為佢地比人逼到絕路，
佢地見唔到希望，見唔到未來，
只有爛命一條。
比著我係何韻詩，
上街？
坦白講我做唔出。
我寧願做個離地既名人，
我寧願繼續好似咩事都無唱我鐘意既歌，
我寧願係Facebook上面隔岸觀火。
當日有個人叫何韻詩，
大大聲幫你地上街爭取。
因為佢覺得我地被欺壓 ；
因為佢覺得社會太病態；
因為佢覺得我地受到唔公平既對待。
今日我地睇住佢既一個活動可以人地報紙寫一寫就消失。
踩到上心口。
我地做左d咩？我地可以做d咩？
其實無力感上腦既我只可以講：
「對唔住，何韻詩。」